پاکستان میں خلائی تحقیق کے ادارے سپارکو (پاکستان سپیس اینڈ اپر ایٹموسفیر ریسرچ کمیشن) نے پیشگوئی کی ہے کہ اس سال رمضان المبارک کا آغاز اتوار، 2 مارچ 2025 کو ہوگا۔

پیر کے روز ایک رپورٹ میں سپارکو نے کہا ہے کہ پاکستان میں عید الفطر 31 مارچ 2025 کو متوقع ہے۔

سپارکو نے کہا ہے کہ درست فلکیاتی ماڈلز کے مطابق رمضان کے لیے نیا چاند (محاق یعنی چاند اورسورج کے سیدھی لائن میں آنا ) 28 فروری 2025 کو پاکستانی وقت کے مطابق شام 5 بج کر 45 منٹ پر ہوگا۔ تاہم ہلال کی رویت مختلف عوامل پر منحصر ہے جیسے چاند کی عمر، سورج سے اس کا زاویائی فاصلہ، سورج غروب ہونے کے وقت کی بلندی، اور موسمی حالات۔

بیان میں کہا گیا ہے کہ اس کے نتیجے میں شعبان کے 30 دن مکمل ہونے کا امکان ہے اوریکم رمضان المبارک 2 مارچ کو ہوگا۔

مرکزی رویت ہلال کمیٹی ملک بھر سے چاند نظر آنے سے متعلق شہادتوں کا جائزہ لے گی اور رمضان المبارک کے آغاز کا باضابطہ اعلان کرے گی۔