عالمی تیل کی منڈی 2024 میں ایک ایسی صورت حال کی عکاسی کررہی تھی جس میں اتار چڑھاؤ اور لچک کا امتزاج تھا، جہاں قیمتوں اور طلب کے ڈائنامکس جغرافیائی سیاسی واقعات، پالیسی فیصلوں اور اقتصادی رجحانات کے جواب میں تبدیل ہوتے رہے۔ برینٹ کرُوڈ، جو کہ عالمی معیار ہے، 2024 میں اوسطاً 84.67 ڈالر فی بیرل رہا، جبکہ ویسٹ ٹیکساس انٹرمیڈیٹ (ڈبلیو ٹی آئی) قدرے کم رہا، جو کہ اوسطاً 78.34 ڈالر فی بیرل تھا۔ ان نسبتا مستحکم اوسط قیمتوں کے باوجود، پورے سال کے دوران قیمتوں میں نمایاں اتار چڑھاؤ دیکھا گیا۔
جغرافیائی سیاسی واقعات، جیسے کہ مشرقی یورپ میں جاری کشیدگی اور اوپیک پلس کی جانب سے پیداوار میں رد و بدل، نے مارکیٹ کو تشکیل دینے میں اہم کردار ادا کیا۔ سال کے شروع میں، تیل کی قیمتوں میں اضافہ ہوا جب اوپیک پلس نے پیداوار میں 1.66 ملین بیرل فی دن (بی پی ڈی) کی کمی کا اعلان کیا، تاکہ اقتصادی بے یقینی کے دوران قیمتوں کو مستحکم کیا جا سکے۔ تاہم، تیسرے سہ ماہی تک، عالمی اقتصادی ترقی میں سست روی کے خدشات کے باعث قیمتوں میں کمی آئی، اور برینٹ کی قیمت عارضی طور پر 80 ڈالر فی بیرل سے نیچے گر گئی۔
عالمی تیل کی طلب 2024 میں تقریباً 2.2 ملین بیرل فی دن بڑھی، جو کہ 103.2 ملین بیرل فی دن تک پہنچ گئی، جیسا کہ بین الاقوامی توانائی ایجنسی ( آئی ای اے) نے رپورٹ کیا۔ یہ اضافہ زیادہ تر ہوائی سفر کی بحالی اور ایشیا میں خاص طور پر چین اور ہندوستان میں مضبوط صنعتی سرگرمی کے باعث تھا۔ اوپیک نے یہ نوٹ کیا کہ ایشیائی مارکیٹس نے اضافی طلب کا 60 فیصد سے زائد حصہ تشکیل دیا، جو کہ عالمی توانائی کے منظرنامے میں ان کے اہم کردار کو اجاگر کرتا ہے۔
اس کے برعکس، ترقی یافتہ معیشتوں میں، خاص طور پر یورپ اور شمالی امریکہ میں، طلب کم رہی۔ آئی ای اے نے یہ عوامل اجاگر کیے کہ الیکٹرانک گاڑیوں کی تیزی دے قبولیت اور قابل تجدید توانائی میں سرمایہ کاری میں اضافے کے باعث ان خطوں میں ترقی کی رفتار سست ہوئی۔
برینٹ اور ڈبلیو ٹی آئی کی قیمتوں نے اپنے متعلقہ مارکیٹ ڈائنامکس کو عکاسی کی۔ برینٹ کی ڈبلیو ٹی آئی پر موجود پریمیم برقرار رہی، جو کہ یورپ اور ایشیا میں برینٹ سے جڑے گریڈز کی طلب کی وجہ سے تھی۔ دوسری طرف، ڈبلیو ٹی آئی کی قیمتوں پر امریکہ میں موجود بلند اسٹاک سطحوں اور برآمد کی محدود صلاحیت کا اثر تھا۔
آگے چل کر، 2025 میں عالمی خام تیل کی مارکیٹ مختلف غیر یقینی صورتحال اور مواقع کا سامنا کرے گی۔ آئی ای اے نے اپنی تازہ ترین ماہانہ رپورٹ میں عالمی تیل کی طلب میں 1.7 ملین بیرل فی دن کے اضافے کی پیش گوئی کی ہے، جو کہ 104.9 ملین بیرل فی دن تک پہنچنے کا امکان ہے۔ یہ اضافہ ابھرتی ہوئی مارکیٹس، خاص طور پر ایشیا میں، سے متوقع ہے، جبکہ ترقی یافتہ معیشتوں میں طلب کے رک جانے کا امکان ہے۔
اوپیک پلس پُرامید ہے، اور اس بات پر زور دے رہا ہے کہ زیادہ سرمایہ کاری مستقبل کی طلب کو پورا کرنے کے لیے ضروری ہوگی۔ تاہم، اس نے اس بات پر بھی احتیاط ظاہر کی ہے کہ سرمایہ کاری کی کمی کے خطرات ہیں، جو سپلائی کی کمی اور قیمتوں میں اتار چڑھاؤ کا سبب بن سکتے ہیں۔
وہ عوامل جو 2025 میں عالمی خام تیل کو متاثر کریں گے ان میں اہم تیل پیدا کرنے والے علاقوں میں جاری کشیدگی شامل ہیں جو سپلائی چینز کو متاثر کر کے قیمتوں کو مزید بڑھا سکتی ہیں۔ اس کے برعکس، اگر تنازعات کا حل نکل آتا ہے تو مارکیٹ مستحکم ہو سکتی ہے۔ عالمی اقتصادی بحالی، خاص طور پر ابھرتی ہوئی مارکیٹس میں، تیل کی طلب کو تشکیل دینے میں اہم کردار ادا کرے گی۔ یورپ اور شمالی امریکہ میں پائیداری اور کاربن کی کمی پر زور، طویل مدت میں خام تیل کی طلب کو کم کر سکتا ہے۔ تاہم، ٹرمپ کے تیل کیلئے کھدائی کو تیز کرنے کے منصوبے اور امریکہ کا پیرس معاہدے سے انخلا اس کے برعکس صورتحال پیدا کر سکتے ہیں جب تک کہ دوسرے ممالک خلا کو پُر نہ کریں۔
مجموعی طور پر، اوپیک پلس کے پیداوار کے فیصلے مارکیٹ کی استحکام کے اہم محرک رہیں گے۔ تجزیہ کار اس بات پر تقسیم ہیں کہ آیا اوپیک پلس مزید کمی کرے گا یا مارکیٹ میں حصص کو برقرار رکھنے کے لیے پیداوار میں اضافہ کرے گا۔