پاکستان اسٹاک ایکسچینج (پی ایس ایکس) میں تیزی کا رجحان جاری ہے اور جمعہ کو انٹرا ڈے ٹریڈنگ کے ابتدائی سیشن کے دوران بینچ مارک کے ایس ای 100 انڈیکس پہلی بار 90 ہزار کی بلند سطح بھی عبور کر گیا۔

سہہ پہر 3 بجکر 55 منٹ پر بینچ مارک انڈیکس 1210.36 پوائنٹس یا 1.36 فیصد اضافے سے 90,156.34 پوائنٹس پر جاپہنچا۔

واضح رہے کہ ایک موقع پر انڈیکس 90,593.61 کی بلند ترین سطح پر پہنچ گیا تھا جو اب انٹرا ڈے کی ریکارڈ سطح ہے۔

آٹوموبائل اسمبلرز، کمرشل بینکوں، فرٹیلائزر، تیل و گیس کی تلاش کرنے والی کمپنیوں اور او ایم سیز سمیت انڈیکس ہیوی اسٹاک میں بھرپور خریداری دیکھی گئی۔

او جی ڈی سی، پی پی ایل، ایس ایس جی سی، این بی پی اور ایم ای بی ایل سمیت انڈیکس ہیوی اسٹاک میں مثبت رجحان رہا۔

حالیہ ہفتوں کے دوران اسٹاک مارکیٹ میں بہتری کا رجحان رہا ہے جس کی وجہ بہتر معاشی اشاریوں اور اسٹیٹ بینک کی جانب سے مانیٹری پالیسی کمیٹی (ایم پی سی) کے آئندہ اجلاس میں پالیسی ریٹ میں نمایاں کمی کی توقعات ہیں۔

یاد رہے کہ جمعرات کو بینچ مارک انڈیکس 1,751.45 پوائنٹس یا 2.01 فیصد اضافے سے88,945.99 پوائنٹس کی بلند ترین سطح پر بند ہوا تھا۔

عالمی سطح پر چین کے حصص جمعہ کو مستحکم رہے اور ہفتے کے دوران اس میں معمولی اضافہ متوقع تھا کیونکہ سرمایہ کار بیجنگ کے مالیاتی محرکات اور اگلے ماہ ہونے والے امریکی انتخابات کے نتائج کا انتظار کررہے ہیں۔

چین کے بلیو چپ سی ایس آئی 300 انڈیکس اور شنگھائی کمپوزٹ انڈیکس میں کوئی تبدیلی نہیں دیکھی گئی۔

دریں اثنا، جاپان کے نکی حصص کی اوسط میں جمعہ کو دوسرے ہفتے میں گراوٹ ریکارڈ کی گئی کیونکہ سرمایہ کاروں نے مقامی انتخابات سے قبل خطرے کے نقطہ نظر کا جائزہ لیا جس میں حکمراں جماعت اپنی اکثریت کھوسکتی ہے۔

دوپہر کے وقفے تک نکی تقریبا 1 فیصد گر کر 37,771.79 پر آگیا ، جس سے بینچ مارک انڈیکس ہفتے کے دوران 3 فیصد کی کمی کی راہ پر گامزن ہے۔

وسیع تر ٹوپیکس بھی ایک فیصد کمی کے ساتھ 2,609.83 پر بند ہوا۔

یہ انٹرا ڈے اپ ڈیٹ ہے