وزارت تجارت کے ذرائع نے بزنس ریکارڈر کو بتایا کہ وزیر سرمایہ کاری خالد الفالح کی سربراہی میں سعودی عرب سے نجی شعبے کی 32 معروف کمپنیوں پر مشتمل ایک اعلیٰ سطحی وفد 9 سے 11 اکتوبر 2024 تک پاکستان کا دورہ کرے گا۔
ذرائع نے انکشاف کیا کہ سعودی عرب کی چھ کمپنیوں نے توانائی کے شعبے میں دلچسپی کا اظہار کیا ہے، دونوں ممالک کے درمیان مفاہمت کی یادداشت پر دستخط متوقع ہیں۔
سرمایہ کاری کے تحفظ سے متعلق امور پر اختلافات کی وجہ سے طویل عرصے سے زیر التوا دوطرفہ سرمایہ کاری معاہدے (بی آئی ٹی) سمیت کچھ امور پر بھی تبادلہ خیال کیا جائے گا۔
ذرائع کا کہنا ہے کہ سعودی عرب سمیت جی سی سی ممالک بزنس ٹو بزنس سطح پر پاکستان میں سرمایہ کاری کے بدلے خصوصی سلوک چاہتے ہیں۔ حکومت پہلے ہی جی سی سی ممالک کی تجاویز کے مطابق بی آئی ٹی میں ترمیم کے لئے اپنی رضامندی کا اشارہ دے چکی ہے۔
پاکستان نے سعودی عرب سے مختلف شعبوں میں 15 سے 20 ارب ڈالر کی سرمایہ کاری کا تخمینہ لگایا ہے جس میں پبلک سیکٹر کے اداروں کی خریداری یا حصص کی خریداری بھی شامل ہے۔
سعودی عرب نے ہوٹل انڈسٹری، قابل تجدید توانائی کے منصوبوں بالخصوص جنوبی پنجاب میں شمسی توانائی کے منصوبوں، ریکوڈک اور پیٹرو کیمیکل ریفائنری میں سرمایہ کاری میں دلچسپی ظاہر کی ہے۔ مئی 2024 میں وفاقی حکومت نے سعودی عرب کو اسلام آباد کے اہم مقامات پر ہوٹلوں کے لیے دو پلاٹس کی پیشکش کی تھی۔
پٹرولیم ڈویژن چین کے سائنوپیک کے ساتھ مشترکہ منصوبے کے طور پر پیٹروکیمیکل ریفائنری کے قیام پر تبادلہ خیال کرے گا۔ تاہم ماضی میں اس طرح کی کوششوں کا کوئی نتیجہ برآمد نہیں ہوا۔
وزیر اعظم نے وزارت تجارت کو 10 اکتوبر 2024 کو وفد کے لئے مندرجہ ذیل اہم انتظامات کرنے کا ٹاسک دیا ہے: (1) ایک سیکٹرل بریک آؤٹ سیشن کا اہتمام کریں ، جس کا انعقاد وزارت توانائی (پاور ڈویژن) متعلقہ ریگولیٹر اداروں / تنظیموں کے ساتھ کرے گی۔ اور (ii) توانائی کے شعبے میں کام کرنے والے پاکستانی کاروباری اداروں کے ساتھ سعودی کمپنیوں کی بزنس ٹو بزنس ملاقاتوں کا اہتمام کرنا۔
ذرائع کا کہنا ہے کہ وزیراعظم آفس نے کے الیکٹرک کے معاملات پر تازہ ترین معلومات طلب کی ہیں کیونکہ سعودی کمپنی الجومیہ کے نمائندے بھی سرکاری وفد کا حصہ ہوں گے۔
سعودی عرب نے جنوبی پنجاب میں سولر پی وی پاور پراجیکٹ کے قیام میں سرمایہ کاری میں دلچسپی ظاہر کی تھی جو اب ملک میں ضرورت سے زیادہ پیداوار اور بڑے پیمانے پر سولرائزیشن کی وجہ سے عملی جامہ پہنانے کا امکان نہیں ہے۔
پاکستان سعودی وزیر سرمایہ کاری سے دیامر بھاشا ہائیڈرو پاور پراجیکٹ میں سرمایہ کاری کی درخواست بھی کرے گا جس کے لیے 8 ارب ڈالر کی سرمایہ کاری درکار ہے تاہم اب تک کوئی معاہدہ نہیں ہوا ہے۔
کاپی رائٹ بزنس ریکارڈر، 2024