شوگر ملز نے چینی برآمد کرنے کی اجازت مانگ لی

پاکستان شوگر ملز ایسوسی ایشن نے وزارت تجارت سے مہنگی چینی برآمد کرنے کی اجازت مانگ لی ہے، پیداواری لاگت بڑھنے کی وجہ سے مقامی مارکیٹ میں بھی چینی کی قیمتوں میں اضافہ ہوگیا ہے۔

واضح رہے کہ شوگر ملز نے مارکیٹ سے 600 روپے من کے حساب سے گنے کی خریداری کی ہے جبکہ پنجاب میں گنے کی سپورت پرائس400 روپے من اور سندھ میں 425 روپے من مقرر کی گئی تھی۔

کرشنگ سیزن کے دوران شوگر ملز نے کسی بھی قیمت پر گنے کی خریداری کے لیے ایک دوسرے کے ساتھ مقابلے بازی کی، حالانکہ گنے کی فصل کی پیداور کافی بہتر تھی اور چینی کی پیداوار بھی گزشتہ برس سے زیادہ تھی۔ زیادہ نرخوں پر گنا خریدنے کی غلطی کے بعد چینی کی پیداواری لاگت بڑھ گئی۔ اب شوگرملز قیمتوں میں اضافے کیلئے چنی ایکسپورٹ کرنے کی اجازت طلب کررہی ہیں ۔

پی ایس ایم اے کے وزیر تجارت کو لکھے گئے خط کے مطابق چینی کی صنعت ٹیکسٹائل کے بعد پاکستان کی دوسری بڑی زرعی صنعت ہے۔ یہ زراعت، ٹرانسپورٹ، متعلقہ صنعتوں، ہول سیل اور ریٹیل مارکیٹوں میں سالانہ 800 ارب سے 1000 ارب روپے کی براہ راست اور بالواسطہ کاروباری سرگرمیوں کا باعث ہے۔ یہ وفاقی، صوبائی اور مقامی حکومتوں کو بالواسطہ اور بالواسطہ ٹیکسوں کی مد میں تقریباً 125 ارب روپے ادا کرتے ہیں۔ یہ 1.5 ملین لوگوں کو براہ راست روزگار فراہم کرتے ہیں اور 5 ارب ڈالر کی درآمدبھی کرتے ہیں۔

پی ایس ایم اے نے اپنے خط میں وزیر تجارت کو آگاہ کیا ہے کہ کرشنگ سیزن کے اختتام پر چینی کی اضافی پیداوار حاصل کی گئی ہے۔ موجودہ سال میں چینی 6 ایم ایم ٹی کی سالانہ طلب کے مقابلے میں 7.5 ایم ایم ٹی کی اضافی پیداوار حاصل ہوئی ہے، جس میں سرپلس 1.5 ایم ایم ٹی ہے۔

پی ایس ایم اے کا موقف ہے کہ کرنسی کی قدر میں کمی، چینی کی مقامی طلب اور ایتھنول کی پیداوار میں اضافے جبکہ بھارت کی جانب سے چینی برآمد پر پابندی کی وجہ سے اس وقت پاکستان کے پاس چینی برآمد کرنے کا بہتر موقع موجود ہے۔