پاکستان اور امریکہ کا دوطرفہ تعلقات کو مزید مستحکم اور متنوع بنانے کا عزم

پاکستان اور امریکہ نے باہمی دلچسپی کے شعبوں میں دوطرفہ تعلقات کو مزید مستحکم کرنے اور وسعت دینے پر اتفاق کیا ہے۔ یہ بات ریڈیو پاکستان نے ایک رپورٹ میں بتائی ہے۔

سیکرٹری خارجہ آمنہ بلوچ اور امریکی کانگریس کے وفد کے درمیان ہفتہ کو اسلام آباد میں ہونے والی ملاقات کے دوران اس عزم کا اظہار کیا گیا۔

رپورٹ کے مطابق وفد میں کانگریس مین جیک برگمین، ٹام سوزی اور جوناتھن جیکسن شامل تھے۔

قبل ازیں چیف آف آرمی اسٹاف جنرل سید عاصم منیر سے جنوبی اور وسطی ایشیائی امور کے سینئر بیورو آفیسر ایرک میئر کی سربراہی میں ایک اعلیٰ سطح کے امریکی وفد نے جی ایچ کیو میں ملاقات کی۔

پاک فوج کے شعبہ تعلقات عامہ (آئی ایس پی آر) کی جانب سے جاری بیان کے مطابق وفد نے اس بات پر زور دیا کہ پاکستان کے ساتھ معدنیات کی ترقی میں تعاون باہمی دلچسپی کا بنیادی شعبہ ہے اور ملک میں سرمایہ کاری کے مسلسل بہتر ہوتے ہوئے منظرنامے کی تعریف کی۔

آئی ایس پی آر کے مطابق یہ ملاقات پاکستان کے معدنی سرمایہ کاری فورم کے پس منظر میں ہوئی جس میں امریکی وفد نے اس اقدام کو اپنی نوعیت کا پہلا فورم قرار دیا اور باہمی فائدے مند شراکت داری کے ذریعے اپنی وسیع معدنی دولت کو فروغ دینے کی پاکستان کی پالیسی پر اعتماد کا اظہار کیا۔

ایرک میئر نے امریکی انتظامیہ کی ترجیحات پر روشنی ڈالتے ہوئے کہا کہ پاکستان کے ساتھ معدنیات کی ترقی میں تعاون باہمی دلچسپی کا بنیادی شعبہ ہے۔

وفد نے پاکستان میں معدنی سرمایہ کاری کے امکانات کے بارے میں بھی امید کا اظہار کیا اور دوطرفہ تعلقات کو مضبوط بنانے کے طریقوں پر تبادلہ خیال کیا۔

مذاکرات میں عالمی اور علاقائی سلامتی کی حرکیات کا بھی احاطہ کیا گیا اور دونوں فریقوں نے پاکستان کی سلامتی کی ضروریات پر اپنا اپنا نقطہ نظر بیان کیا۔