سونے کی فی تولہ قیمت میں مزید 1800 روپے کا اضافہ

پاکستان میں سونے کے نرخوں میں اضافے کا سلسلہ جاری ہے اور یہ نئی ریکارڈ سطح پر پہنچ گیا ہے۔ مقامی صرافہ مارکیٹوں میں ہفتے کے روز سونے کی فی تولہ قیمت ایک روز میں 1800 روپے اضافے کے بعد 3 لاکھ 40 ہزار 600 روپے ہوگئی ہے۔

آل پاکستان جیمز اینڈ جیولرز صرافہ ایسوسی ایشن (اے پی جی جے ایس اے) کے مطابق 10 گرام سونے کی قیمت 1543 روپے اضافے کے بعد 2 لاکھ 92 ہزار 9 روپے ہوگئی۔

جمعہ کو سونے کی فی تولہ قیمت 10 ہزار روپے اضافے کے بعد 3 لاکھ 38 ہزار 800 روپے کی نئی ریکارڈ سطح پر پہنچ گئی تھی۔

جمعہ کو سونے کے بین الاقوامی نرخ میں بھی اضافہ ہوا۔ اے پی جی جے ایس اے کے مطابق فی اونس سونے کی قیمت 3،236 ڈالر رہی، جس میں کاروباری دن کے دوران 18 ڈالر کا ریکارڈ اضافہ دیکھا گیا۔

دوسری جانب چاندی کی فی تولہ قیمت 3 ہزار 234 روپے پر برقرار ہے۔