سیکورٹی فورسز نے پاک افغان سرحد کے ذریعے دراندازی کی کوشش کرنے والے 8 دہشت گردوں کو ہلاک کردیا جبکہ اس دوران 4 دیگر زخمی ہوگئے۔ یہ بات اتوار کو فوج کے میڈیا ونگ نے بتائی ہے۔
پاک فوج کے شعبہ تعلقات عامہ (آئی ایس پی آر) کے مطابق 5 اور 6 اپریل کی رات کو پاک افغان سرحد کے قریب عسکریت پسندوں کی نقل و حرکت کا پتہ چلا۔ سیکیورٹی فورسز نے فوری جوابی کارروائی کی جس کے بعد فائرنگ کا شدید تبادلہ ہوا جو کئی گھنٹوں تک جاری رہا۔
بیان میں مزید کہا گیا ہے کہ “دراندازوں کو مؤثر طریقے سے نشانہ بنایا گیا، جس کے نتیجے میں 8 خوارج ہلاک اور چار شدید زخمی ہو گئے، انہوں نے مزید کہا کہ زخمی دہشت گرد سرحد پار فرار ہوگئے۔
بیان میں مزید کہا گیا ہے کہ پاکستان نے عبوری افغان حکومت پر مسلسل زور دیا ہے کہ وہ موثر سرحدی انتظام کو یقینی بنائے اور پاکستان کے خلاف دہشت گردی کے لیے افغان سرزمین کے استعمال کو روکے۔
عبوری افغان حکومت سے توقع کی جاتی ہے کہ وہ اپنی ذمہ داریاں پوری کرے گی اور دہشت گردوں کو اپنی سرزمین استعمال کرنے نہیں دے گی۔
آئی ایس پی آر نے کہا کہ پاکستان کی سیکیورٹی فورسز ملک کی سرحدوں کی حفاظت اور دہشت گردی کے خطرے کو ختم کرنے کے لئے پرعزم ہیں۔
Comments