آرمی چیف کا وانا اور ڈی آئی خان کا دورہ، سرحد پر تعینات افسروں اور جوانوں کے ساتھ عید منائی

آرمی چیف جنرل سید عاصم منیر نے وانا اور ڈیرہ اسماعیل خان کا دورہ کیا اور سرحد پر تعینات افسروں اور جوانوں کے ساتھ عید منائی۔

پاک فوج کے شعبہ تعلقات عامہ (آئی ایس پی آر) کے مطابق آرمی چیف عاصم منیر نے عید کی نماز ادا کی اور پاکستان کے استحکام اور خوشحالی کے لیے دعا کی۔

آرمی چیف عاصم منیر نے پاک فوج کے جوانوں کو عید الفطر کی مبارکباد دیتے ہوئے ان کی غیر متزلزل لگن اور قوم کی مثالی خدمت کو سراہا۔

انہوں نے کہا کہ آپ کا عزم اور لچک نہ صرف ہمارے وطن کو محفوظ بناتی ہے بلکہ پاکستان سے آپ کی گہری محبت کی بھی عکاسی کرتی ہے۔

انہوں نے مسلح افواج اور قانون نافذ کرنے والے اداروں کی کارکردگی کو سراہا، ساتھ ہی خیبر پختونخوا کے عوام کی بھی تعریف کی، جو ہمیشہ دہشت گردی کے خلاف بہادری سے ڈٹے رہے ہیں۔

آرمی چیف نے کہا کہ آپ کی وابستگی اور قربانیاں ہمارے وطن کے تحفظ کی ضمانت ہیں، یہ قربانیاں پاکستان سے آپ کی گہری محبت کی بھی عکاسی کرتی ہیں۔

آرمی چیف نے شہدا کی قربانیوں کو خراج عقیدت پیش کیا اور کہا کہ امن واستحکام کے لیے شہدا کی جدوجہد ہماری کامیابی کی بنیاد ہے۔

آرمی چیف کی آمد پر کور کمانڈر پشاور نے ان کا پرتپاک استقبال کیا۔