وزیر مملکت برائے داخلہ کی لندن میں بارڈر سیکورٹی سمٹ 2025 میں شرکت

وزیر مملکت برائے داخلہ طلال چوہدری نے لندن میں منعقدہ بارڈر سیکورٹی سمٹ 2025 میں شرکت کی جہاں انہوں نے برطانوی وزیر داخلہ یویٹ کوپر، برطانیہ کے نائب وزیر خارجہ ہمیش فاکنر اور انجیلا ایگل سے ملاقاتیں کیں۔

فواد چوہدری نے جرمنی، اسپین، آسٹریا اور پولینڈ کے وزرائے داخلہ سے بھی بات چیت کی جس میں سرحدی سیکورٹی اور بین الاقوامی تعاون پر توجہ مرکوز کی گئی۔

برطانوی حکام سے بات چیت کے دوران فواد چوہدری نے غیر قانونی امیگریشن کو روکنے اور تارکین وطن کے لیے قانونی راستوں کو فروغ دینے کی ضرورت پر زور دیا۔ انہوں نے امیگریشن کے چیلنجز سے نمٹنے کے لئے برطانوی حکومت کی کوششوں کو سراہا اور اس سلسلے میں تعاون کو مضبوط بنانے کے لئے پاکستان کے عزم کا اظہار کیا۔

برطانیہ کے نائب وزیر خارجہ ہمیش فاکنر نے پاکستان کے وزیر داخلہ محسن نقوی کے ساتھ گزشتہ ملاقات کے مثبت نتائج کا اعتراف کرتے ہوئے سلامتی کے امور پر بہتر دوطرفہ تعاون کو اجاگر کیا۔

طلال چوہدری نے سرحدی سلامتی، انسداد دہشت گردی اور انسانی اسمگلنگ پر مشترکہ حکمت عملی کی اہمیت پر زور دیتے ہوئے کہا کہ محفوظ، قانونی اور منظم نقل مکانی کو یقینی بنانے کے لئے ملکر کام کرنے کی ضرورت ہے۔

انہوں نے غیر قانونی امیگریشن اور سرحد پار جرائم کی روک تھام کے لئے عالمی تعاون پر پاکستان کے موقف کا اعادہ کیا اور اس بات پر زور دیا کہ غیر قانونی تارکین وطن، دہشت گردی اور انسانی اسمگلنگ جیسے چیلنجوں سے نمٹنے کے لئے ایک جامع اور طویل مدتی نقطہ نظر کی ضرورت ہے۔

فواد چوہدری نے کہا کہ وزیراعظم اور وزیر داخلہ کی ہدایات کے تحت پاکستان غیر قانونی امیگریشن سے نمٹنے، سرحدی سیکیورٹی بڑھانے اور منظم جرائم کے خاتمے کے لیے عالمی سطح پر فعال طور پر مصروف عمل ہے۔