آرمی چیف نے مغربی سرحد پر جوانوں کے ساتھ عید منائی

پاک فوج کے شعبہ تعلقات عامہ (آئی ایس پی آر) کے مطابق آرمی چیف جنرل سید عاصم منیر نے مغربی سرحد پر تعینات افسران اور جوانوں کے ساتھ عید الفطر منائی، دعا کی اور قومی استحکام اور خوشحالی کے لیے دلی خواہشات کا اظہار کیا۔

وانا، جنوبی وزیرستان اور ڈیرہ اسماعیل خان کے دورے کے دوران آرمی چیف نے نماز عید میں شرکت کی اور قوم کی فلاح و بہبود کے لیے نیک خواہشات کا اظہار کیا۔

جوانوں سے خطاب کرتے ہوئے جنرل عاصم منیر نے ان کے غیر متزلزل عزم کو سراہتے ہوئے کہا کہ آپ کی لگن نہ صرف قوم کی حفاظت کو یقینی بناتی ہے بلکہ حب الوطنی کا حقیقی ثبوت بھی ہے۔

انہوں نے افسران اور جوانوں کی ثابت قدم خدمات کی تعریف کی اور ملک کی سرحدوں کی حفاظت میں ان کے اہم کردار پر زور دیا۔

آرمی چیف نے خیبر پختونخوا کے عوام کی بہادری کا اعتراف کرتے ہوئے کہا کہ خیبر پختونخوا کے عوام نے دہشت گردی کے خلاف جنگ میں مسلسل غیر معمولی لچک کا مظاہرہ کیا ہے۔

انہوں نے خطے میں امن برقرار رکھنے کے لیے مسلح افواج، قانون نافذ کرنے والے اداروں اور عوام کی مشترکہ کاوشوں کو سراہا۔

جنرل عاصم منیر نے کہا کہ فوج کی کامیابیوں کی جڑیں ان شہداء کی قربانیوں پر منحصر ہیں جنہوں نے امن و استحکام کے عظیم مقصد کے لئے اپنی جانوں کا نذرانہ پیش کیا۔

قبل ازیں پشاور پہنچنے پر کور کمانڈر پشاور نے آرمی چیف کا پرتپاک استقبال کیا جنہوں نے علاقے میں تعینات فورسز کی انتھک کاوشوں کو سراہا۔