سعودی ولی عہد کا پاکستانی کمیونٹی کیلئے فلاحی اقدامات میں اضافے کا عزم

سعودی عرب نے سعودی عرب میں مقیم پاکستانی کمیونٹی کی نمایاں خدمات کا اعتراف کیا ہے اور ان کی فلاح و بہبود کے لیے اقدامات بڑھانے پر اتفاق کیا ہے۔

ان خیالات کا اظہار سعودی ولی عہد شہزادہ محمد بن سلمان نے وزیراعظم شہباز شریف سے ملاقات کے دوران کیا۔

ملاقات میں پاکستان اور سعودی عرب کے درمیان مضبوط اور تاریخی تعلقات کا اعادہ کیا گیا جس میں اقتصادی، تجارت، سرمایہ کاری، توانائی اور دفاعی شعبوں میں تعاون بڑھانے پر تبادلہ خیال کیا گیا۔ وزیر اعظم کے دفتر (پی ایم او) کی جانب سے جاری ایک بیان میں کہا گیا ہے کہ دونوں رہنماؤں نے دونوں ممالک کے درمیان بڑھتے ہوئے اقتصادی تعاون پر اطمینان کا اظہار کیا۔

انہوں نے سعودی عرب کی جانب سے اہم شعبوں میں سرمایہ کاری بڑھانے کے عزم کو سراہا جس سے پاکستان کی معاشی ترقی اور استحکام میں مدد ملے گی۔

وزیراعظم آفس نے کہا کہ دونوں فریقوں نے علاقائی سلامتی کے چیلنجوں سے نمٹنے کے لئے مشترکہ کوششوں کی اہمیت کو تسلیم کرتے ہوئے دفاعی اور سیکورٹی تعاون کو مستحکم کرنے کے اپنے عزم کا اعادہ کیا۔

ملاقات میں بدلتی ہوئی علاقائی صورتحال اور جغرافیائی سیاسی منظرنامے پر تفصیلی تبادلہ خیال کیا گیا اور دونوں رہنماؤں نے خطے میں امن، استحکام اور خوشحالی کے لئے اپنے مشترکہ وژن کو فروغ دینے کے لئے ہر سطح پر مل کر کام کرنے پر اتفاق کیا۔دونوں رہنماؤں نے عوامی سطح پر تعلقات، ثقافتی تبادلوں اور تعلیمی تعاون کو مزید مستحکم کرنے کی ضرورت پر زور دیا۔

سعودی ولی عہد اور وزیراعظم نے باہمی احترام، مشترکہ مفادات اور ترقی و خوشحالی کے مشترکہ وژن پر مبنی پاکستان اور سعودی عرب کی شراکت داری کو نئی بلندیوں تک لے جانے کے عزم کا اعادہ کیا۔

وزیراعظم شہباز شریف چار روزہ سرکاری دورے پر سعودی عرب پہنچ گئے ہیں۔ ان کے ہمراہ نائب وزیراعظم اور وزیر خارجہ سینیٹر اسحاق ڈار اور اہم وفاقی وزراء بھی موجود ہیں۔

دفتر خارجہ کی جانب سے جاری بیان میں کہا گیا ہے کہ وزیراعظم کا دورہ پاکستان اور سعودی عرب کے درمیان گہرے تاریخی تعلقات کی عکاسی کرتا ہے اور باہمی تعاون میں اضافے، تجارت، سرمایہ کاری میں تعاون بڑھانے اور دوطرفہ، علاقائی اور عالمی امور پر زیادہ سے زیادہ سفارتی تعاون کی راہ ہموار کرے گا۔