نائب وزیراعظم اور وفاقی وزیر خارجہ اسحاق ڈار نے پاکستان کی معاشی ترقی کی رفتار پر اطمینان کا اظہار کرتے ہوئے کہا ہے کہ پاکستان جلد ترقی یافتہ ممالک میں شامل ہوجائے گا اور امکان ہے کہ 2030 تک جی 20 کا حصہ بن جائے گا۔
انہوں نے اس بات پر زور دیا کہ تمام ریگولیٹری باڈیز ملک کی ترقی کو مزید تیز کرنے کے لئے باہمی تعاون اور مؤثر طریقے سے کام جاری رکھیں۔
ان خیالات کا اظہار انہوں نے اسلام آباد میں مسابقتی کمیشن آف پاکستان (سی سی پی) کے نئے ہیڈکوارٹرز کا سنگ بنیاد رکھنے کی تقریب سے خطاب کرتے ہوئے کیا۔
تقریب میں وفاقی وزیر قانون و انصاف اعظم نذیر تارڑ، وزیر خزانہ محمد اورنگزیب، وزیر علی پرویز ملک، وفاقی سیکرٹری قانون و انصاف راجہ نعیم، مسابقتی کمیشن کے چیئرمین ڈاکٹر کبیر احمد سدھو، سیکیورٹیز اینڈ ایکسچینج کمیشن آف پاکستان (ایس ای سی پی) کے چیئرمین عاکف سعید اور دیگر سینئر حکام نے شرکت کی۔
اسحاق ڈار نے کہا کہ پاکستان کے پاس کانوں اور معدنیات، گرینائٹ، ہائیڈرو کاربن، پتھروں اور دیگر وسائل کے وسیع ذخائر موجود ہیں جن کی مالیت کم از کم 10 ٹریلین ڈالر ہے۔
اسحاق ڈار نے پاکستان میں کاروباری اداروں کے لئے یکساں مواقع کو یقینی بنانے اور سرمایہ کاری کو فروغ دینے کے لئے ایک مضبوط مسابقتی کمیشن کی اہمیت پر زور دیا۔ انہوں نے نشاندہی کی کہ بدقسمتی سے ملک کی مارکیٹوں میں کارٹیلز بن چکے ہیں جو صارفین کا استحصال کر رہے ہیں اور حکومتی اقدامات میں رکاوٹ بن رہے ہیں۔ اس منظر نامے کو دیکھتے ہوئے ، انہوں نے کہا کہ مسابقتی کمیشن کی دوہری ذمہ داری ہے: نہ صرف کارٹیلز کے خلاف کارروائی کرنا بلکہ صارفین کے حقوق کا تحفظ بھی کرنا۔
انہوں نے تشویش کا اظہار کرتے ہوئے کہا کہ مسابقتی کمیشن جرات مندانہ فیصلے کرتا ہے لیکن عدالت کے جاری کردہ حکم امتناع ان مقدمات کو منطقی انجام تک پہنچنے سے روکتے ہیں۔ تاہم انہوں نے امید ظاہر کی کہ وزیر قانون اعظم نذیر تارڑ اور وزیر خزانہ محمد اورنگزیب کی قیادت میں مسابقتی کمیشن مزید کامیابی حاصل کرے گا۔
انہوں نے مسابقتی کمیشن کے چیئرمین ڈاکٹر کبیر احمد سدھو کی بھی تعریف کی جنہوں نے کمیشن کو صحیح سمت میں موثر انداز میں چلایا۔
ماضی کے معاشی چیلنجز پر روشنی ڈالتے ہوئے اسحاق ڈار نے کہا کہ 2013 میں پاکستان کو میکرو اکنامک طور پر غیر مستحکم ملک سمجھا جاتا تھا اور سرمایہ کار اپنا سرمایہ بیرون ملک منتقل کرنے پر غور کر رہے تھے۔ تاہم انہوں نے اس بات پر زور دیا کہ صحیح حکمت عملی کے ساتھ اس طرح کے چیلنجوں سے مؤثر طریقے سے نمٹا جاسکتا ہے۔
کاپی رائٹ بزنس ریکارڈر، 2025
Comments