وزیراعظم شہباز شریف آذربائیجان کا دورہ کریں گے، دوطرفہ تعلقات کے فروغ پر تبادلہ خیال ہوگا، دفتر خارجہ

آذربائیجان کے صدر الہام علیوف کی دعوت پر وزیر اعظم شہباز شریف 24 سے 25 فروری تک جمہوریہ آذربائیجان کے دو روزہ سرکاری دورے پر روانہ ہوں گے۔ یہ بات ہفتے کے روز وزارت خارجہ امور کی جانب سے جاری ایک بیان میں کہی گئی ہے۔

مارچ 2024 میں عہدہ سنبھالنے کے بعد وزیر اعظم شہباز شریف کا آذربائیجان کا یہ دوسرا دورہ ہے جس سے دوطرفہ تعلقات کو مضبوط بنانے کے پاکستان کے عزم کا اعادہ ہوتا ہے۔

دفتر خارجہ کے بیان کے مطابق وزیراعظم کے ہمراہ اعلیٰ سطح کا وفد بھی ہوگا جس میں نائب وزیراعظم اور وزیر خارجہ اسحاق ڈار سمیت کابینہ کے دیگر اہم ارکان شامل ہوں گے۔

دفتر خارجہ نے بیان میں کہا ہے کہ یہ دورہ آذربائیجان کے ساتھ اپنے تعلقات کو مضبوط بنانے کے پاکستان کے پختہ عزم کی عکاسی کرتا ہے۔

وزیراعظم کے اس دورے کے دوران دونوں فریقین توانائی، تجارت، دفاع، تعلیم اور موسمیاتی تبدیلی سمیت باہمی دلچسپی کے شعبوں میں تعاون بڑھانے کے لیے وسیع پیمانے پر تبادلہ خیال کریں گے۔ توقع ہے کہ کئی مفاہمتی یادداشتوں اور معاہدوں پر دستخط کیے جائیں گے، جس سے شراکت داری مزید مستحکم ہوگی۔

دفتر خارجہ نے مزید کہا ہے کہ پاکستان اور آذربائیجان کے درمیان گہرے برادرانہ تعلقات ہیں جو باہمی اعتماد، افہام و تفہیم اور دیرینہ تعاون پر مبنی ہیں۔

آذربائیجان پاکستان کے اہم اقتصادی اور اسٹریٹجک شراکت داروں میں سے ایک ہے، جس میں متعدد شعبوں میں مضبوط تعاون ہے۔

بیان میں مزید کہا گیا ہے کہ وزیراعظم شہباز شریف آذربائیجان کی ایکسپورٹ اینڈ انوسٹمنٹ پروموشن ایجنسی (ازپرومو) کے تعاون سے منعقدہ بزنس فورم سے بھی خطاب کریں گے۔

مزید برآں وزیر اعظم اور صدرالہام علیوف آزاد کرائے گئے علاقوں کے خصوصی دورے کے حصے کے طور پر فوزولی (کاراباخ) کا دورہ کریں گے۔

یہ دورہ آذربائیجان کے ساتھ مشترکہ ترقی کے لئے وسیع تر اقتصادی تعاون کو فروغ دینے اور شراکت داری کی نئی راہیں تلاش کرنے کے پاکستان کے پختہ عزم کی عکاسی کرتا ہے۔