چیف جسٹس یحییٰ آفریدی سے فنانس ڈویژن کی درخواست پر آئی ایم ایف کے وفد کی ملاقات

عالمی مالیاتی فنڈ (آئی ایم ایف) کے وفد نے چیف جسٹس پاکستان جسٹس یحییٰ آفریدی سے فنانس ڈویژن کی درخواست پر ملاقات کی۔ یہ بات سپریم کورٹ کی جانب سے منگل کے روز جاری ایک اخباری بیان میں کہی گئی ہے۔

وزارت خزانہ نے اتوار کے روز کہا تھا کہ آئی ایم ایف کا تین رکنی وفد پاکستان کا دورہ کرے گا تاکہ ملک کے 2024 کے توسیعی فنڈ سہولت پروگرام کے تحت گورننس اور کرپشن کا تشخیصی جائزہ لیا جاسکے۔

منگل کے روز جاری بیان میں مزید کہا گیا ہے کہ چیف جسٹس یحییٰ آفریدی نے وفد کا خیرمقدم کیا اور عدالتی کارکردگی کو بہتر بنانے کے لیے جاری کوششوں کا جائزہ پیش کیا۔

بیان میں مزید کہا گیا ہے کہ چیف جسٹس کا کہنا تھا کہ عدلیہ ایسے مشنز سے براہ راست رابطے کی عادی نہیں لیکن جب سے فنانس ڈویژن نے درخواست کی ہے، یہ بات چیت ہو رہی ہے۔

اعلامیے کے مطابق ملاقات کے دوران چیف جسٹس نے جوڈیشل کمیشن آف پاکستان (جے سی پی) کے حوالے سے اہم آئینی پیش رفت اور اصلاحات پر روشنی ڈالی جن میں سینئر سطح کی عدالتی تقرریاں، عدالتی احتساب اور جے سی پی کی تنظیم نو شامل ہیں۔

انہوں نے مزید شفاف اور موثر عدالتی انتخاب کے عمل کو یقینی بنانے کے لئے عدلیہ اور پارلیمانی کمیٹی کو ضم کرنے کی خوبیوں پر تفصیل سے روشنی ڈالی۔

انہوں نے یہ بھی بتایا کہ سپریم کورٹ فروری کے آخری ہفتے میں متوقع این جے پی ایم سی [نیشنل جوڈیشل (پالیسی میکنگ) کمیٹی] کے آئندہ اجلاس کے لئے ایک اہم ایجنڈے کو حتمی شکل دینے کے عمل میں ہے۔ یہ ایجنڈا مختلف اسٹیک ہولڈرز کی مشاورت سے تیار کیا جا رہا ہے۔ انہوں نے کہا کہ وہ مجوزہ ایجنڈے میں شامل کرنے کے لئے کسی بھی تجویز کے لئے بالکل تیار ہیں۔ انہوں نے مشن کو کسی بھی اہم تجویز کو شیئر کرنے کی دعوت دی۔

سپریم کورٹ کی پریس ریلیز کے مطابق آئی ایم ایف کے وفد نے قانونی اور ادارہ جاتی استحکام برقرار رکھنے میں عدلیہ کے کردار کا اعتراف کیا اور گورننس اور احتساب کو مضبوط بنانے کے مقصد سے جاری اصلاحات کی تعریف کی۔

بیان میں مزید کہا گیا ہے کہ بات چیت میں عدالتی کارکردگی کو بڑھانے اور معاشی اور سماجی ترقی کی بنیاد کے طور پر قانون کی حکمرانی کو برقرار رکھنے کے مشترکہ عزم کا اعادہ کیا گیا۔

آئی ایم ایف کے وفد کی قیادت جوئیل ترکوٹز نے کی جبکہ اجلاس میں رجسٹرار سپریم کورٹ پاکستان ، سیکرٹری سپریم جوڈیشل کونسل، سیکرٹری جوڈیشل کمیشن آف پاکستان، سیکرٹری لاء اینڈ جسٹس کمیشن آف پاکستان اور ڈائریکٹر فیڈرل جوڈیشل اکیڈمی نے بھی شرکت کی۔