وزیراعظم شہبازشریف کا ڈی پی ورلڈ پر پاکستان میں سرگرمیاں بڑھانے پر زور

وزیرِاعظم شہباز شریف نے دبئی، متحدہ عرب امارات (یواےای) میں قائم بین الاقوامی لاجسٹکس کمپنی ڈی پی ورلڈ پر زور دیا ہے کہ وہ پاکستان میں اپنی سرگرمیوں کو وسعت دے اور جبل علی پورٹ جیسے کامیاب منصوبے یہاں پر بھی لے کر آئے ۔

تفصیلات کے مطابق وزیراعظم شہبازشریف نے دبئی میں ورلڈ گورنمنٹ سمٹ کے موقع پر ڈی پی ورلڈ کے گروپ چیئرمین اور سی ای او سلطان احمد بن سلیمان سے ملاقات کی۔

ملاقات کے دوران شہبازشریف نے ڈی پی ورلڈ کے وژن اور کاروباری حکمت عملی کو سراہا۔

انہوں نے کہا کہ پاکستان کا اسٹریٹجک محل وقوع ڈی پی ورلڈ کو اپنے آپریشنز کو وسعت دینے اور جبل علی بندرگاہ جیسے کامیاب منصوبے دہرانے کا بہترین موقع فراہم کرتا ہے۔

ملاقات کے دوران وزیرِاعظم نے ڈی پی ورلڈ کے وفد کے حالیہ دورہ پاکستان کو سراہا اور کہا کہ اس سے پاکستان اور ڈی پی ورلڈ کے درمیان مؤثر سرمایہ کاری شراکت داری کی راہ ہموار ہوئی ہے۔

انہوں نے اس بات پر زور دیا کہ اس طرح کے روابط اور تعاون سے پاکستان اور متحدہ عرب امارات کے درمیان تجارتی تعلقات کو مضبوط بنانے میں مدد ملے گی۔

شہبازشریف نے ڈی پی ورلڈ کی پاکستان میں سرمایہ کاری کو سراہا اور تجارت اور لاجسٹک انفرااسٹرکچر کو بڑھانے میں ڈی پی ورلڈ کے کردار کا اعتراف کیا۔

انہوں نے ڈی پی ورلڈ کے ساتھ دستخط شدہ بین الحکومتی معاہدوں (آئی جی اے) کے تحت منصوبوں کی بروقت تکمیل کیلئے پاکستان کے عزم کا اعادہ کیا۔

ملاقات کے دوران وزیراعظم نے کہا کہ پاکستان نے خصوصی سرمایہ کاری سہولت ی کونسل (ایس آئی ایف سی) کے ذریعے سرمایہ کاری کے طریقہ کار کو ہموار کیا ہے، شفافیت کو فروغ دیا ہے اور مجموعی طور پر کاروباری ماحول کو بہتر بنایا ہے جس سے ملک عالمی سرمایہ کاروں کے لیے ایک پرکشش مقام بن گیا ہے۔

دریں اثناء ڈی پی ورلڈ کے گروپ چیئرمین نے تعاون کو فروغ دینے میں اپنی حکومت کی مسلسل حمایت پر وزیراعظم کا شکریہ ادا کیا۔

انہوں نے ڈی پی ورلڈ کے اپنے منصوبوں پر بروقت عملدرآمد کو یقینی بنانے اور تعاون کی نئی راہیں تلاش کرنے کے عزم کا اعادہ کیا۔

ڈی پی ورلڈ کے چیئرمین نے بتایا کہ متحدہ عرب امارات میں پاکستانی مصنوعات کے فروغ کے لئے ایک مخصوص نمائش ہال مختص کیا گیا ہے تاکہ اماراتی مارکیٹ میں پاکستانی مصنوعات کی نمائش اور رسائی کو بڑھایا جاسکے۔