ٹیرف کی جنگ: محفوظ اثاثوں میں سرمایہ کاروں کی دلچسپی بڑھنے سے سونے کی قیمتیں ریکارڈ سطح پر جا پہنچیں

امریکہ اور چین کے درمیان محصولات کی جنگ کے درمیان سرمایہ کاروں کی جانب سے محفوظ اثاثوں کی جانب راغب ہونے کے باعث بدھ کے روز سونے کی قیمتیں ریکارڈ سطح پر پہنچ گئیں۔

پاکستان میں بدھ کے روز فی تولہ سونے کی قیمت میں زبردست اضافہ ہوا ہے اور 5,300 روپے کے اضافے کے بعد فی تولہ سونے کی قیمت ریکارڈ 299,600 روپے تک پہنچ گئی۔

آل پاکستان جیمز اینڈ جیولرز صرافہ ایسوسی ایشن (اے پی جی جے ایس اے) کے مطابق 10 گرام سونے کی قیمت 4 ہزار 158 روپے اضافے کے بعد 2 لاکھ 56 ہزار 859 روپے ہوگئی۔

خبر رساں ادارے روئٹرز کے مطابق قیمتوں میں اضافے کی وجہ چین اور امریکہ کے درمیان ایک نئی تجارتی جنگ کے خدشات ہیں کیونکہ بیجنگ نے چینی مصنوعات پر نئے امریکی محصولات کے جواب میں امریکی درآمدات پر محصولات عائد کیے ہیں۔

امریکی صدر ڈونلڈ ٹرمپ نے میکسیکو، کینیڈا اور چین سے آنے والی اشیاء پر وسیع پیمانے پر ٹیرف عائد کرنے کا حکم دیتے ہوئے مطالبہ کیا تھا کہ وہ امریکہ میں فینٹینائل کی آمد کو روکیں — جبکہ کینیڈا اور میکسیکو سے غیرقانونی تارکین وطن کی آمد بھی روکنے کا مطالبہ کیا — جس کے نتیجے میں ایک تجارتی جنگ کا آغاز ہوا جو عالمی ترقی کو متاثر کر سکتی ہے اور مہنگائی میں پھر سے اضافہ کرسکتی ہے۔

تاہم پیر کے روز ٹرمپ نے آخری لمحات میں ہونے والی بات چیت کے بعد میکسیکو پر محصولات کو ایک ماہ کے لیے روک دیا تھا لیکن کینیڈا کے ساتھ مذاکرات میں ابھی تک کوئی پیش رفت نہیں ہوئی ہے۔

دریں اثنا بدھ کے روز سونے کی بین الاقوامی قیمت بھی ریکارڈ سطح پر پہنچ گئی۔ اے پی جی جے ایس اے کے مطابق عالمی مارکیٹ میں 53 ڈالر کے اضافے کے بعد فی اونس سونے کی قیمت 2,868 ڈالر تک جا پہنچی ہے۔

منگل کو پاکستان میں سونے کی فی تولہ قیمت ایک ہزار 900 روپے اضافے سے 2 لاکھ 94 ہزار 300 روپے کی بلند ترین سطح پر پہنچ گئی تھی۔

دوسری جانب چاندی کی فی تولہ قیمت 36 روپے اضافے سے 3 ہزار 350 روپے ہوگئی۔