پی ٹی آئی کمیٹی نے اسپیکر قومی اسمبلی کو حکومت سے مذاکرات کے تیسرے دور کی تاریخ دے دی

آج نیوزکی رپورٹ کے مطابق پاکستان تحریک انصاف (پی ٹی آئی) کی مذاکراتی کمیٹی نے تجویز دی ہے کہ اسپیکر قومی اسمبلی کل (اتوار) یا اس کے اگلے روز حکومتی کمیٹی کے ساتھ مذاکرات کا تیسرا دور منعقد کریں۔

پاکستان تحریک انصاف (پی ٹی آئی) کی مذاکراتی کمیٹی کے ترجمان صاحبزادہ حامد رضا کا کہنا ہے کہ اپوزیشن کی مذاکراتی کمیٹی تیسرے اجلاس کے لیے تیار ہے جو اتوار 12 جنوری یا پیر 13 جنوری کو ہوگا۔

ان کا یہ بیان اسپیکر قومی اسمبلی ایاز صادق کے اس بیان کے بعد سامنے آیا ہے جس میں انہوں نے اشارہ دیا تھا کہ کسی بھی فریق نے ملاقات کے لیے ان سے رابطہ نہیں کیا۔

پاکستان تحریک انصاف (پی ٹی آئی) کے بانی عمران خان نے اپنی جماعت کی مذاکراتی ٹیم کو حکومت کے ساتھ مذاکرات جاری رکھنے کی ہدایت کی ہے۔

پاکستان تحریک انصاف (پی ٹی آئی) کی قیادت نے حکومت کے ساتھ سنجیدہ مذاکرات جاری رکھنے کے لیے جیل میں قید اپنی پارٹی کے بانی عمران خان تک بلا روک ٹوک رسائی کا مطالبہ کیا ہے۔

اس سے قبل پی ٹی آئی نے مطالبات کی حتمی فہرست کے حوالے سے عمران خان سے مشاورت کے لیے حکومت سے مزید وقت کی درخواست کی تھی کیونکہ مذاکرات کا دوسرا دور گزشتہ ہفتے اسلام آباد میں اختتام پذیر ہوا تھا۔

مذاکرات کا پہلا دور 23 دسمبر کو ہوا تھا، جس کے دوران حکومت نے پی ٹی آئی سے اگلے اجلاس میں اپنے چارٹر آف ڈیمانڈ پیش کرنے کو کہا تھا۔

پی ٹی آئی کے متوقع مطالبات میں سیاسی قیدیوں کی رہائی اور 9 مئی اور 26 نومبر کے واقعات کی تحقیقات کے لیے جوڈیشل کمیشن کا قیام شامل ہے۔

تاہم مطالبات پیش کرنے کے بجائے، پی ٹی آئی کمیٹی نے حکومت سے اگلے ہفتے مذاکرات کے لئے ایک نئی تاریخ مقرر کرنے کی درخواست کی، کیونکہ انہوں نے فہرست تیار کرنے کے لئے جیل میں اپنی پارٹی کے بانی سے ملنے تک رسائی طلب کی ہے۔