ریفنڈز کی عدم ادائیگی سے موسمی پھلوں کی برآمدات متاثر

موسمی پھلوں کے برآمد کنندگان سردیوں کے دوران برآمدی آرڈرز پورے کرنے میں ناکام رہے ہیں، جس کی وجہ 2022 سے زیرِ التوا سیلز ٹیکس ریفنڈ کی عدم ادائیگی اور فیڈرل بورڈ آف ریونیو (ایف بی آر) کی متعلقہ فیلڈ فارمیشنز کی جانب سے پیدا کی جانے والی بیوروکریٹک رکاوٹیں ہیں۔

نقد رقم کی کمی اور متعلقہ ریجنل ٹیکس آفس کی جانب سے کسی سہولت کی عدم فراہمی کے باعث موسمی پھلوں کی برآمدات روک دی گئی ہیں۔

اس صورتحال کا سختی سے نوٹس لیتے ہوئے ایف بی آر نے متعلقہ چیف کمشنر ریجنل ٹیکس آفس کو ایک خط جاری کیا ہے، جس میں اس معاملے کو ترجیحی بنیادوں پر حل کرنے کی ہدایت کی گئی ہے۔ ایف بی آر کے مطابق ریفنڈ کلیمز سرگودھا کے ریجنل ٹیکس آفس میں جولائی 2023 سے جون 2024 کے عرصے کے متعلق زیرِ التوا ہیں۔

چیئرمین ایف بی آر راشد محمود لنگڑیال سے درخواست کی گئی ہے کہ وہ غیر زیرو ریٹڈ سیکٹرز کے برآمد کنندگان، بشمول موسمی پھلوں کے برآمد کنندگان کو ریفنڈز کی عدم ادائیگی کی وجوہات کا جائزہ لیں۔ یہ بھی واضح کیا جائے کہ کس طرح سرگودھا جیسے چھوٹے ریجنل ٹیکس آفس (آر ٹی او) نے پچھلے دو سالوں کے دوران بڑے پیمانے پر زیر التوا ریفنڈز کے باعث موسمی پھلوں کی برآمدات کو روک دیا ہے؟

یہ مخصوص معاملہ ٹیکس حکام کے لئے ایک چیلنج ہے کہ کس طرح ہر قسم کی آٹومیشن، نئے نظام، الیکٹرانک ریفنڈ ادائیگی کے نظام جیسے اسٹار، فاسٹر کے ذریعے براہ راست کریڈٹ کی ادائیگی اور برآمد کنندگان کے لئے دیگر تیز رفتار عمل کے باوجود برآمد کنندگان کو ریفنڈز کی ادائیگی نہیں کی جاتی ہے۔ جولائی 2024 میں کمشنر ان لینڈ ریونیو (ریفنڈز) کو تمام ریجنل ٹیکس دفاتر اور کارپوریٹ ریجنل ٹیکس دفاتر میں تعینات کیا گیا تھا تاکہ زیر التوا ریفنڈ کلیمز کو کلیئر کیا جا سکے۔ آر ٹی او سرگودھا نے گزشتہ دو سال کے دوران موخر کلیمز سمیت برآمد کنندگان کے کلیمز کی ادائیگی کیوں نہیں کی؟

“کینو، ترشاوہ پھلوں اور آم کے برآمد کنندگان کو بھاری نقصان اٹھانا پڑ رہا ہے، کیونکہ انہیں اپنے موسمی کاروبار کے لیے نقد رقم کی ضرورت ہوتی ہے، اور اس تاخیر کا مطلب ملکی خزانے کو غیر ملکی زرمبادلہ کا نقصان بھی ہے۔ برآمد کنندگان نے بار بار آر ٹی او سے درخواست کی ہے کہ ٹیکس سال 2022-23 اور 2023-24 کے لئے سیلز ٹیکس ریفنڈ کی رقم جمع کرنے کے لئے فوری کارروائی کی جائے۔

چیئرمین ایف بی آر کو بتایا گیا کہ آل پاکستان فروٹ اینڈ ویجیٹیبل، ایکسپورٹرز، امپورٹرز اینڈ مرچنٹس ایسوسی ایشن (پی ایف وی اے) دنیا بھر میں پھلوں و سبزیوں کی برآمد کے ذریعے غیر ملکی زرمبادلہ کے حصول میں نمایاں کردار ادا کرتی ہے۔ برآمدات کو بڑھانے کے لیے پی ایف وی اے کی انتھک کوششوں کے نتیجے میں اس کی برآمدات میں ابتدائی چند ملین ڈالر سے مستقل اضافہ ہوا، جو مالی سال 2023-24 میں 3 ارب امریکی ڈالر تک پہنچ گئی۔ پی ایف وی اے نے شکایت کی ہے کہ پانچ زیرو ریٹڈ سیکٹرز کے مقابلے میں برآمد کنندگان کے ساتھ امتیازی سلوک ہو رہا ہے، کیونکہ ہمارے برآمد کنندگان کے سیلز ٹیکس ریفنڈز طویل عرصے سے زیر التوا ہیں، حالانکہ ہم نے کمشنر ان لینڈ ریونیو، آر ٹی او سرگودھا کو متعدد خطوط لکھے ہیں۔

گزشتہ کینو سیزن (2023-24) میں برآمد کنندگان کو مختلف مسائل کی وجہ سے بھاری نقصان اٹھانا پڑا، جن میں کم معیار کی پیداوار، یوکرین-روس جنگ، کنٹینر فریٹ کی بلند قیمتیں اور دیگر ناگزیر عوامل شامل تھے۔ اس کے نتیجے میں پھلوں اور سبزیوں کے برآمد کنندگان سنگین نقدی کی قلت کا سامنا کر رہے ہیں۔نقدی کی قلت ایک بنیادی مسئلہ ہے، کیونکہ مالی وسائل میں کمی کی وجہ سے برآمد کنندگان کی ورکنگ کیپٹل کا بڑا حصہ، جو کہ 200 ملین روپے سے زائد تخمینہ لگایا گیا ہے، ٹیکس سال 2023-24 کے سیلز ٹیکس ریفنڈ میں پھنسا ہوا ہے۔اس حقیقت کے پیش نظر، نقدی کی قلت کے باعث برآمد کنندگان موجودہ کینو سیزن کے ساتھ ساتھ آئندہ آلو اور دیگر پھلوں کی برآمدات کے آرڈرز پورے کرنے سے قاصر ہیں، حالانکہ ان کے پاس ایک معقول تعداد میں برآمدی آرڈرز موجود ہیں۔

درخواست میں موقف اختیار کیا گیا کہ وزیراعظم کی جانب سے 3 مارچ 2024 کو ایف بی آر کو ریفنڈ کی تیز رفتار اور موخر رقم پر کارروائی کی ہدایت کے باوجود ایف بی آر کی جانب سے خصوصی ریفنڈ زونز کے اجراء کے بعد آر ٹی او سرگودھا جیسی فیلڈ فارمیشنز کو ہدایات جاری کرنے اور زیر التوا سیلز ٹیکس ریفنڈ جاری کرنے کا اختیار سی آئی آر ریفنڈ کو دیا گیا ہے۔ آر ٹی او سرگودھا نے ابھی تک ایکسپورٹ ممبران کے پورے ٹیکس سال 2023-24 کے لئے سیلز ٹیکس ریفنڈ جاری نہیں کیا۔

انہوں نے کہا کہ ہمیں واقعی فنڈز کی ضرورت ہے لہذا برائے مہربانی فروٹ اینڈ ویجیٹیبل سیکٹر کے برآمد کنندگان کے ٹیکس سال 2023-24 کے سیلز ٹیکس ریفنڈ کی مد میں زیر التوا رقم کو ادا کریں۔ ایسوسی ایشن نے چیئرمین ایف بی آر سے درخواست کی کہ چونکہ یہ مسئلہ انتہائی سنگین نوعیت کا ہے جس سے پی ایف وی اے کے برآمدی اراکین کے نقد بہاؤ بری طرح متاثر ہو رہے ہیں لہذا درخواست کی جاتی ہے کہ ٹیکس سال 2023-24 کے لئے سیلز ٹیکس ریفنڈ کی رقم جمع کرانے کے لئے فوری کارروائی شروع کی جائے۔

سیلز ٹیکس کی رقم زیر التوا ہونے کے حوالے سے ایکسپورٹرز کو سیلز ٹیکس کلیمز کی پروسیسنگ میں مشکلات کا سامنا ہے، کوئی بھی اس بارے میں سنجیدہ نہیں اور ایف بی آر سے متعدد خطوط کے باوجود کوئی جواب نہیں آیا، اور ممبر ان لینڈ ریونیو (آپریشنز) سے ملاقات کے لیے کوششیں بھی کی گئیں تاکہ مسائل کو پیش کیا جا سکے جو طویل عرصے سے زیر التوا ہیں۔ ان برآمد کنندگان کے ساتھ امتیازی سلوک کیا جا رہا ہے، کیونکہ پانچ زیرو ریٹڈ سیکٹرز کو اپڈیٹ کیا گیا ہے اور انہیں اگست 2024 تک سیلز ٹیکس ریفنڈ مل چکا ہے، جبکہ موسمی پھلوں کے برآمد کنندگان کے کلیمز سرگودھا کے آر ٹی او میں جولائی 2023 سے جون 2024 تک ابھی تک زیر التواء ہیں۔

ایسوسی ایشن نے مزید کہا کہ چونکہ یہ مسائل سنگین نوعیت کے ہیں، اس لیے درخواست کی جاتی ہے کہ فوری طور پر سیلز ٹیکس ریفنڈ کی رقم کو کریڈٹ کیا جائے جو پہلے ہی جاری کی جاچکی ہے، اور طویل عرصے سے زیر التواء سیلز ٹیکس ریفنڈ کلیمز کی پروسیسنگ کی جائے۔

کاپی رائٹ بزنس ریکارڈر، 2024