سرکاری اداروں میں اصلاحات کی پیچیدگیاں

خراب کارکردگی کا مظاہرہ کرنے والے سرکاری ادارے (ایس او ایز) جو سنگین نااہلیوں اور کئی سال سے اربوں روپے کے خسارے کا شکار ہیں، طویل عرصے سے عوامی وسائل پر بوجھ بنے ہوئے ہیں جس کے نتیجے میں حکومت کے پاس مالی استحکام کے لیے کافی کم گنجائش رہ گئی ہے۔

اسٹیٹ بینک آف پاکستان (ایس بی پی) کی حالیہ جاری کردہ سالانہ رپورٹ 2023-24 میں اس بات پر توجہ مرکوز کی گئی جس میں ”پاکستان میں سرکاری اداروں کی اصلاحات“ کے عنوان سے ایک سیکشن شامل تھا۔ اس رپورٹ میں اصلاحات کے عمل کی انتہائی سست رفتاری پر افسوس کا اظہار کیا گیا جس کی وجہ سے ان اداروں نے گزشتہ 8 سالوں میں مسلسل خسارے کی رپورٹ دی ہے۔ حکومت کی جانب سے ان اداروں کو سبسڈی، گرانٹ، قرضے اور ایکویٹی انجیکشن کی صورت میں فراہم کی جانے والی مالی معاونت مالی سال 2016 سے مالی سال 2023 کے دوران 5.7 ٹریلین روپے یا جی ڈی پی کے 1.4 فیصد تک پہنچ چکی ہے۔

یہ واضح ہے کہ سرکاری اداروں (ایس او ایز) کے لیے حکومتی معاونت اور بیل آؤٹس کے موجودہ طرز عمل میں نمایاں تبدیلی لانا ضروری ہے تاکہ پاکستان کی مالیاتی استحکام کے حوالے سے بڑھتے ہوئے خدشات کو دور کیا جاسکے۔

اسٹیٹ بینک کی رپورٹ کے مطابق زیادہ تر نقصانات دو شعبوں سے پیدا ہوتے ہیں: توانائی و انفرااسٹرکچر، ٹرانسپورٹ اور انفارمیشن ٹیکنالوجی اینڈ کمیونی کیشنز (آئی ٹی سی)۔ ان شعبوں کے نقصانات دیگر شعبوں خاص طور پر تیل اور گیس کے ذریعے پیدا ہونے والے منافع سے کہیں زیادہ ہیں، جو مجموعی ایس او ای منافع میں سب سے بڑا حصہ دار ہے۔

بجلی شعبے میں مجموعی طور پر 208 ارب روپے کا نقصان ریکارڈ کیا گیا جو مالی سال 23 میں ایس او ای کے کل نقصانات کا 29 فیصد ہے جب کہ انفرااسٹرکچر ْ، ٹرانسپورٹ اور آئی ٹی سی سیکٹر مجموعی ایس او ای نقصانات کا 69 فیصد کا ذمہ دار ہے، اس سلسلے میں نیشنل ہائی وے اتھارٹی اور پی آئی اے اہم کردار ادا کر رہے ہیں۔ اکثر یہ نظر انداز کردیا جاتا ہے کہ کئی منافع بخش سرکاری ادارے (ایس او ایز) حکومتی معاہدوں سے خاطر خواہ فائدہ اٹھاتے ہیں اور اگر انہیں مسابقتی مارکیٹ کے حالات کا سامنا کرنا پڑے تو وہ اپنی کارکردگی برقرار رکھنے میں مشکل محسوس کرسکتے ہیں۔

بین الاقوامی سطح پر سرکاری اداروں (ایس او ایز) کی اصلاحات کی کامیاب مثالوں سے ظاہر ہوتا ہے کہ ان اداروں کی مؤثر تبدیلیاں زیادہ تر ان شعبوں کی بامعنی تنظیمِ نو پر منحصر ہوتی ہیں جن میں یہ کام کررہے ہوتے ہیں، جس میں ڈی ریگولیشن اور بڑھتی ہوئی مسابقت کو فروغ دینے پر توجہ دی جاتی ہے۔

مزید برآں ایک مؤثر اصلاحاتی عمل کیلئے مضبوط کارپوریٹ گورننس فریم ورک کا قیام بھی ضروری ہے جو اسٹریٹجک مینجمنٹ کی خامیوں کو دور کرے اور شفافیت و جوابدہی کو فروغ دے۔ عام تاثر کے برعکس، ملکیت میں تبدیلی لانا، پیچیدہ اور طویل نجکاری کے عمل کے ذریعے، سرکاری اداروں کی ساختی خامیوں کے حل کا لازمی علاج نہیں ہے۔

پاکستان میں حقیقی اور مؤثر اصلاحات کے عمل کو شروع کرنے کی گہری مزاحمت نے اصلاحاتی کوششوں کو بکھرا ہوا بنا دیا ہے، جن میں عموماً ہم آہنگی اور سمت کا فقدان نظر آتا ہے۔ یہ کوششیں زیادہ تر بین الاقوامی قرض دہندگان کے دباؤ پر کی جاتی ہیں بجائے اس کے کہ خسارے میں چلنے والے اداروں میں حقیقی اور دیرپا تبدیلی لانے کی اندرونی تحریک پر مبنی ہوں۔

ایس او ایز کی تنظیم نو کے بہترین راستے پر سیاسی اتفاق رائے کا فقدان، بیوروکریسی اور ایس او ایز کے اندر مزاحمت، لیبر مسائل کو منظم کرنے میں مشکلات اور ایس او ایز اصلاحات سے متعلق بین الاقوامی بہترین طریقوں اور مہارت کو عام طور پر نظر انداز کرنے نے اس عمل کو ایک پیچیدہ اور محنت طلب کوشش بنا دیا ہے۔

رپورٹ کے مطابق نجکاری کے معاملات اکثر بہت زیادہ طول کھینچ لیتے ہیں، مکمل ہونے میں تقریباً 6 سے 16 سال لگتے ہیں۔ اس لیے یہ حیرت کی بات نہیں ہے کہ پی آئی اے کی نجکاری، جو اپنے بڑے خسارے کے باعث ایک چیلنجنگ اور وقت طلب کوشش ثابت ہورہی ہے، اس سے سرکاری اداروں (ایس او ایز) کی اصلاحات کی پیش رفت میں رکاوٹ پیدا ہورہی ہے۔

اس شعبے میں حکومتی عزم میں اضافے کے حالیہ اشارے کے باوجود جیسے کہ گزشتہ سال اہم قوانین کی منظوری اور ایس او ایز کیلئے مستقل کابینہ کمیٹی کا قیام جو کارپوریٹ گورننس کو بہتر بنانے اور شعبوں میں مسابقت کو فروغ دینے پر مرکوز ہے، کسی بھی مستقل اثر کا حصول صرف حقیقی سیاسی ارادے اور اتفاقِ رائے کے ساتھ ممکن ہوگا، نیز ایک جامع اصلاحاتی اقدام کیلئے عوامی حمایت بھی ضروری ہے۔

مزید برآں یہ ضروری ہے کہ سرکاری اداروں (ایس او ایز) کے لیے واضح مقاصد اور کارکردگی کے معیارات قائم کیے جائیں، جو کہ بہتر کارپوریٹ گورننس کو ہدف بنائیں تاکہ جوابدہی، شفافیت اور مؤثر انتظام کو یقینی بنایا جا سکے۔

ایس او ایز کو ملک کے وسیع تر معاشی اہداف سے ہم آہنگ کرنے کے لئے یہ منظم نقطہ نظر اہم ہے ، کیونکہ اس سے وسائل کے زیادہ سے زیادہ استعمال میں سہولت ملے گی ، آمدنی کے ذرائع میں اضافہ ہوگا اور حکومت پر مالی دباؤ کم ہوگا۔

کاپی رائٹ بزنس ریکارڈر، 2024