صدر مملکت سے مولانا فضل الرحمٰن کی ملاقات، سیاسی صورتحال پر تبادلہ خیال

صدر مملکت آصف علی زرداری نے جمعیت علمائے اسلام (ف) کے سربراہ مولانا فضل الرحمان سے ان کی رہائش گاہ پر ملاقات کی۔ اجلاس میں ملک کی مجموعی سیاسی صورتحال پر تبادلہ خیال کیا گیا۔

اجلاس میں وزیر داخلہ محسن نقوی اور جمعیت علمائے اسلام کی قیادت بھی موجود تھی۔

ایک متعلقہ پیشرفت میں، پاکستان تحریک انصاف (پی ٹی آئی) نے جمعہ کو جے یو آئی (ف) سے تعاون کی درخواست کی ہے کہ تاکہ پارلیمنٹ میں حکومت کو گھٹنے ٹیکنے پر مجبور کیا جا سکے۔

سابق قومی اسمبلی کے اسپیکر اسد قیصر کی قیادت میں پی ٹی آئی کی سینئر قیادت کے ایک وفد نے جے یو آئی (ف) کے سربراہ کے ساتھ ان کی رہائش گاہ پر ملاقات کی تھی، جس میں جے یو آئی (ف) کے دیگر سینئر رہنماؤں نے بھی شرکت کی۔

ذرائع نے انکشاف کیا کہ جے یو آئی (ف) کے مرکزی امیر مولانا فضل الرحمان کے ساتھ ملاقات کے دوران، پی ٹی آئی قیادت نے پارلیمنٹ میں موجودہ حکومت کو ”ٹف ٹائم“ دینے کے لیے مل کر کام کرنے کی ضرورت پر زور دیا۔

دونوں جماعتوں نے قیادت اور کارکنوں کے درمیان اختلافات کو کم کرنے کی ضرورت پر بھی زور دیا۔