بی ایف بائیو سائنسز نے انسانی انسولین متعارف کرا دی

پاکستان کی دوا ساز کمپنی بی ایف بائیو سائنسز لمیٹڈ (بی ایف بی ایل) نے ’فرولین‘ برانڈ کے نام سے انسانی انسولین کا کامیاب آغاز کر دیا ہے۔

بی ایف بی ایل کی پیرنٹ کمپنی فیروز سنز لیبارٹریز لمیٹڈ نے جمعرات کو پاکستان اسٹاک ایکسچینج (پی ایس ایکس) کو ایک نوٹس میں یہ اطلاع دی۔

ہمیں آپ کو یہ بتاتے ہوئے خوشی ہو رہی ہے کہ فیروزسنز لیبارٹریز لمیٹڈ کے ماتحت ادارے بی ایف بائیو سائنسز لمیٹڈ نے ’فیرولن‘ برانڈ نام کے تحت انسانی انسولین کا کامیاب آغاز کیا ہے۔

یہ بتانا مناسب ہے کہ انسانی انسولین انسولین کی ایک مصنوعی شکل ہے جو انسانی لبلبے کے ذریعہ قدرتی طور پر پیدا ہونے والی انسولین سے مماثلت رکھتی ہے۔ انسولین ایک ہارمون ہے جو خون میں گلوکوز کی سطح کو مینج کرنے میں اہم کردار ادا کرتا ہے، خاص طور پر ذیابیطس کے مریضوں کے لئے.

دریں اثناء کمپنی نے اپنے بیان میں کہا ہے کہ یہ لانچ ذیابیطس کی روک تھام، مصنوعات کے پورٹ فولیو کو وسعت دینے اور مارکیٹ میں زندگی بچانے والی ادویات کی دستیابی کو بڑھانے کے عزم میں ایک اہم سنگ میل ہے۔

کمپنی نے دعویٰ کیا کہ “فیرولین کو اعلیٰ معیار کے ساتھ تیار کیا گیا ہے اور اس کا مقصد پاکستان بھر میں ذیابیطس کے مریضوں کو مؤثر اور سستا علاج فراہم کرنا ہے۔

کمپنی کا مزید کہنا تھا کہ ہمیں یقین ہے کہ فرولین ہمارے ماتحت ادارے کی ترقی پر مثبت اثر ڈالے گا اور مریضوں کی ضروریات کو پورا کرنے کے لئے ہمارے مشن کو مزید مستحکم کرے گا۔

بی ایف بی ایل، فیروز سنز لیبارٹریز لمیٹڈ اور ارجنٹائن کے باگو گروپ کا مشترکہ منصوبہ ہے، جو فارماسیوٹیکل مصنوعات کی درآمد، مینوفیکچرنگ، مارکیٹنگ اور تقسیم میں مہارت رکھتا ہے۔

کمپنی پی ایس ایکس میں ابتدائی عوامی پیشکش (آئی پی او) کی منصوبہ بندی کر رہی ہے، جس کا مقصد 55 روپے فی حصص کی فلور قیمت پر 25 ملین حصص جاری کرکے کم از کم 1.375 بلین روپے (4.94 ملین ڈالر) جمع کرنا ہے۔

کمپنی ہیپاٹائٹس سے متعلق ادویات (یعنی انٹرفیرون انجکشن) کی مقامی مینوفیکچرنگ میں پیش پیش ہے۔

2020 میں ، بی ایف بی ایل نے گیلیڈ کے گلوبل پیشنٹ سلوشنز (جی پی ایس) پروگرام کے تحت ریمڈیسیور (کووڈ 19 کے مریضوں کے علاج کے لئے ایک اینٹی وائرل دوا) کی تیاری اور فروخت کے لئے گیلیڈ سائنسز انکارپوریٹڈ کے ساتھ ایک غیر خصوصی لائسنس معاہدے پر عمل درآمد کیا۔

بی ایف بی ایل نے کوویڈ 19 وبائی مرض کے دوران ریمڈیسیور کو کامیابی سے تیار کیا ، جس نے مالی سال 22-2021 میں کمپنی کے ریونیو میں تقریبا 2 ارب روپے کا حصہ ڈالا۔