پی ٹی آئی رہنما رؤف حسن دو روزہ جسمانی ریمانڈ پر ایف آئی اے کے حوالے

آج نیوز کے مطابق، اسلام آباد کی ایک ڈسٹرکٹ اینڈ سیشن کورٹ نے منگل کو پاکستان تحریک انصاف (پی ٹی آئی) کے انفارمیشن سیکرٹری رؤف حسن کا دو روزہ جسمانی ریمانڈ وفاقی تحقیقاتی ایجنسی (ایف آئی اے) کو دے دیا۔

تفصیلات کے مطابق، رؤف حسن کو ریاست مخالف پروپیگنڈہ کرنے میں مبینہ طور پر ملوث ہونے کے کیس میں ایف آئی اے کے حوالے کیا گیا ہے۔

ایف آئی اے پراسیکیوٹر نے مبینہ طور پر پروپیگنڈے کے لیے استعمال ہونے والے آلات کی ریکوری کے لیے جسمانی ریمانڈ کی استدعا کی تھی۔

رؤف حسن کو پیر کے روز گرفتار کیا گیا تھا جسے پی ٹی آئی نے اپنے سیکرٹریٹ پر کریک ڈاؤن کہا تھا۔

پی ٹی آئی نے گرفتاری کے بعد ایک پوسٹ میں کہا تھا کہ یہ انتہائی شرمناک ہے کہ کس طرح اسلام آباد پولیس اس ملک کے ہر قانون کو مکمل طور پر نظر انداز کر رہی ہے۔ پاکستان پر جنگل کا قانون راج کر رہا ہے۔

عمران خان کے وکیل علی اعجاز بٹر کے مطابق 300 سے 400 کے قریب پولیس اہلکار پارٹی آفس پہنچے اور رؤف حسن کو گرفتار کر لیا۔