وزیراعظم شہباز شریف کی جانب سے بجلی صارفین کی زائد بلنگ کا نوٹس لینے کے ایک روز بعد وزیر داخلہ محسن نقوی نے اس عمل میں ملوث افسران اور عملے کے خلاف قانونی کارروائی کی ہدایت کی ۔
وزارت داخلہ کے ترجمان کے مطابق وزیر داخلہ نے محفوظ صارفین کی زائد بلنگ کی بڑھتی شکایات کا سخت نوٹس لیا اور اس میں ملوث افسران اور عملے کے خلاف قانونی کارروائی کا حکم دیا۔
وفاقی وزیر نے ایف آئی اے کے تمام ڈائریکٹرز کو ہدایت کی کہ وہ 200 یونٹ تک استعمال کرنے والے صارفین کے ساتھ ہونے والی ناانصافی کا فوری ازالہ کریں ۔ انہوں نے محفوظ صارفین کو غیر محفوظ زمرے میں شامل کرنے پر سختی سے پابندی عائد کرتے ہوئے اسے مجرمانہ فعل قرار دیا جسے برداشت نہیں کیا جائے گا۔
محسن نقوی نے ایف آئی اے کو پوری صورتحال کا جائزہ لینے اور حقائق کی روشنی میں ذمہ داروں کے خلاف بلا امتیاز کارروائی کرنے کا بھی حکم دیا۔ انہوں نے اس بات کا اعادہ کیا کہ محفوظ صارفین کو غیر محفوظ صارفین کی فہرست میں شامل کرنا کسی بھی صورت میں ناقابل قبول ہے۔
وفاقی وزیر نے مزید کہا کہ اوور بلنگ نے صارفین پر کروڑوں روپے کا اضافی بوجھ ڈال دیا ہے اور محفوظ صارفین جو پہلے ہی مشکلات کا سامنا کررہے ہیں وہ مزید متاثر ہوئے ہیں ۔ انہوں نے اس بات پر زور دیا کہ زائد بلنگ کی شکایات اور محفوظ صارفین کو درپیش ناانصافیوں کو فوری طور پر حل کیا جائے۔
کاپی رائٹ بزنس ریکارڈر، 2024
Comments