ریونیو بیسڈ لوڈ شیڈنگ، چیئرمین نیپرا کا حکومت سے قانون میں تبدیلی کا مطالبہ

نیشنل الیکٹرک پاور ریگولیٹری اتھارٹی (نیپرا) کے چیئرمین وسیم مختار نے وفاقی حکومت سے کہا ہے کہ اگر وہ ملک میں ریونیو بیسڈ لوڈ شیڈنگ جاری رکھنا چاہتی ہے تو نیپرا ایکٹ میں تبدیلی کرے۔

ان خیالات کا اظہار انہوں نے اپریل 2024 کے لیے فیول چارجز ایڈجسٹمنٹ (ایف سی اے) کے تعین کے لیے جمعرات کو ہونے والی عوامی سماعت کے دوران کیا۔ سی پی پی اے-جی نے 29 ارب 21 کروڑ روپے کی اضافی رقم کی وصولی کے لیے 3 روپے 49 پیسے فی یونٹ کی مثبت ایڈجسٹمنٹ کا مطالبہ کیا ہے۔ زیادہ مثبت ایڈجسٹمنٹ کی بنیادی وجہ ریفرنس کے مقابلے میں آر ایل این جی پر زیادہ پیداوار اور ہائیڈل ذرائع سے کم پیداوار تھی۔

عوامی سماعت کے دوران چیئرمین نیپرا کو بتایا گیا کہ ایک طرف وزیر توانائی ریونیو بیسڈ لوڈ شیڈنگ کے حق میں ہیں تو دوسری جانب نیپرا ڈسکوز کو نوٹس جاری کر رہا ہے۔

انہوں نے کہا کہ میری رائے میں ریگولیٹر قانون کی دفعات کے مطابق کام کر رہا ہے اور اس شق کی روشنی میں ڈسکوز پر جرمانے عائد کیے جا رہے ہیں۔ چیئرمین نیپرا نے کہا کہ اگر حکومت نقصانات کی بنیاد پر لوڈ شیڈنگ جاری رکھنا چاہتی ہے تو ایکٹ میں ترمیم کرے۔

نیشنل پاور کنٹرول سینٹر (این پی سی سی) کے نمائندے واجد چٹھہ نے اتھارٹی کو بتایا کہ موسمی حالات کی وجہ سے اپریل 2024 میں ریفرنس ڈیمانڈ کے مقابلے میں ڈیمانڈ میں 17 فیصد کمی آئی تھی جبکہ سالانہ کی بنیاد پر ڈیمانڈ میں 14 فیصد کمی دیکھی گئی تھی۔ انہوں نے مزید کہا کہ خالص فیول چارجز کمپوننٹ (ایف سی سی) اپریل 2023 کے مقابلے میں 1.41 روپے فی کلو واٹ کم ہے۔

اپریل میں بجلی کی پیداوار 16 ہزار 118 میگاواٹ جبکہ کم از کم پیداوار 8 ہزار 478 میگاواٹ رہی جس کی بنیادی وجہ محکمہ موسمیات کی پیش گوئی کے برعکس موسمی حالات میں نمایاں تبدیلی تھی۔

واجد چٹھہ کے مطابق تبدیلی کے اہم عوامل مندرجہ ذیل ہیں: (i) محکمہ موسمیات کے مطابق درجہ حرارت معمول سے زیادہ رہا جبکہ اصل درجہ حرارت معمول سے کم (منفی 0.87 ڈگری) رہا اور بارش معمول سے 164 زیادہ ہوئی۔ (ii) ایندھن کے تخمینے موسم کی پیشگوئی اور رمضان کے مطابق کیے گئے تھے۔ (iii) سالانہ کی بنیاد پر ہائیڈرو انڈینٹ کم رہا؛ (iv) نیلم جہلم میں 26 اپریل 2024ء سے جزوی جبری لوڈشیڈنگ جاری ہے۔ اور (5) 500 کے وی دادو شکارپور سرکٹ نمبر 1 اور 2 ٹاور کا گرنا (بالترتیب 13 اپریل 2024 سے 18 اپریل 2024 اور 21 اپریل 2024 تک)۔

انہوں نے مزید کہا کہ حکومت مستقبل قریب میں مختلف پالیسی اقدامات پر غور کر رہی ہے جس سے صارفین کو ریلیف ملے گا۔

چیف ایگزیکٹو آفیسر (سی ای او) ریحان اختر نے اپریل 2024 میں گیس پائپ لائنوں میں زیادہ دباؤ کی وجوہات کی نشاندہی کی: آر ایل این جی کی ضرورت سے زیادہ دستیابی کیونکہ آر ایل این جی کی طلب جنوری 2024 میں محکمہ موسمیات کی پیش گوئی کے مطابق رکھی گئی تھی، جو اپریل کے موسم سے مختلف ہے۔ اور ہائیڈل کی پیداوار بھی نچلی سطح پر تھی۔

انہوں نے مزید کہا کہ سرپلس آر ایل این جی اور قدرتی گیس کی قیمت کا فرق گھریلو شعبے کی طرف موڑ دیا جاتا ہے۔ آر ایل این جی کے حالیہ مالی اثرات 32 ارب روپے تھے۔

سماعت کے دوران مزید بتایا گیا کہ اس وقت نیٹ میٹرنگ کے ذریعے 2 ہزار میگاواٹ بجلی پیدا کی جا رہی ہے جبکہ آف گرڈ کا کوئی ڈیٹا دستیاب نہیں۔ ایف بی آر کے اعداد و شمار کے مطابق یکم جولائی 2023 سے 30 اپریل 2024 تک 6 ہزار 700 میگاواٹ کی سولر پلیٹیں درآمد کی گئیں۔

سی پی پی اے-جی کا کہنا تھا کہ شام کے وقت بجلی کی طلب اس وقت بڑھ جاتی ہے جب سولر سسٹم سے پیداوار دستیاب نہیں ہوتی۔

کاپی رائٹ بزنس ریکارڈر، 2024