ایس ایم ای سیکٹر کو متحرک کرنا

چھوٹے اور درمیانے درجے کے کاروباری اداروں (ایس ایم ایز) کی ترقی کے لیے حکومت نے کاروباروں کو سستے قرض کی سہولت فراہم کرنے کا منصوبہ بنایا ہے۔ حال ہی میں وفاقی کابینہ کے اجلاس کے دوران اس معاملے پر کچھ تفصیل سے تبادلہ خیال کیا گیا، جہاں اس بات پر اتفاق کیا گیا کہ اگر پاکستان ایس ایم ایز کی صلاحیت سے فائدہ اٹھاکر روزگار کے مواقع بڑھانا اور اقتصادی ترقی میں تعاون چاہتا ہے تو ایس ایم ای پر مبنی متبادل فنانسنگ ڈھانچہ وقت کی اہم ضرورت ہے۔

اس حوالے سے فنانس ڈویژن نے متعدد بینکوں کے ساتھ رابطہ کیا ہے اور اسٹیٹ بینک آف پاکستان کی جانب سے ایس ایم ایز کے لیے بینک کے قرضوں تک رسائی کو آسان بنانے کے لیے ایک اسکیم تیار کی گئی ہے۔

قرض کی مستحکم اور مسلسل فراہمی کسی بھی کاروبار کے لیے زندگی کا باعث ہوتی ہے، کیونکہ مناسب فنڈنگ ​​ترقی، تنوع اور روزمرہ کے کاموں کے لیے ضروری مالی وسائل فراہم کرتی ہے۔ تاہم بینکنگ خدمات تک محدود رسائی کی وجہ سے ایس ایم ای سیکٹر کی ترقی میں ہمیشہ رکاوٹیں آتی رہی ہیں۔

برسوں سے ایس ایم ای فنانسنگ کو فروغ دینے کے لیے متعدد کوششیں کی گئی ہیں، لیکن یہ مطلوبہ نتائج دینے میں ناکام رہی ہیں، کیونکہ ایسے کاروباروں کا بڑا حصہ اکثر غیر دستاویزی ہوتا ہے اور غیر رسمی معیشت میں کام کرتا ہے، اور اس طرح قرض کی اہلیت اور خطرے کا اندازہ لگانے سے متعلق بینکنگ خدمات کی بنیادی شرائط کو پورا کرنے میں ناکام رہتا ہے ۔

ایس ایم ای سیکٹر کے بنیادی مسائل حل کئے بغیر اور کاروباروں کی دستاویزی معیشت میں شامل ہونے سے ہچکچاہٹ کو دیکھتے ہوئے یہ حیران کن لگتا ہے کہ یکے بعد دیگرے حکومتوں نے ایس ایم ای فنانسنگ کو بڑھانے کے لیے بینکوں کی حوصلہ افزائی کیوں کی۔

مثال کے طور پر محدود وسائل کے ساتھ ود ہولڈنگ ٹیکس کے نظام کی تعمیل چھوٹے کاروبار کے لیے ایک بوجھ ثابت ہو سکتی ہے، کیونکہ سال بھر کےکاروبار کے لین دین کی رسیدوں اور دیگر متعلقہ مالیاتی معلومات کا دستاویزی ریکارڈ رکھنا بڑا چیلنج ہے۔ جس کے بغیر اسے ٹیکس حکام سے ریفنڈ کا دعوی کرنے کے لیے مشکلات کا سامنا کرنا پڑے گا۔

مزید برآں، مزدوری کے بہت سے قوانین پر عمل کرنے کے ساتھ یونین سے متعلقہ قانون سازی کی بھی ضرورت ہے، اور سماجی تحفظ کی ادائیگیوں اور ای او بی آئی کی شراکت پر نظر رکھنے کی ضرورت ہے،بہت ساری دیگر تفصیلات کے علاوہ پہلے سے رسمی معیشت میں کام کرنے والے کاروبار کو بھی ذہن میں رکھنا ہوگا۔

اس حوالے سے ممنوعہ اخراجات اور دستاویزی معیشت کا حصہ بنانے سے متعلق پیچیدہ ریگولیٹری فریم ورک کی طرف توجہ بھی نہیں دی گئی ہے، اس میں متعلقہ اخراجات برداشت کرنا اور پیچیدہ طریقہ کار پر عمل کرنا شامل ہے، مختلف قانونی ضابطوں کے ساتھ ودہولڈنگ ٹیکس بھی موجودہ ٹیکس نظام میں کاروباری لین دین کے ہر مرحلے پر لاگو ہوتا ہے، جیسے ویلیو ایڈڈ سیلز ٹیکس وغیرہ۔

دستاویزی معیشت میں شامل ہونے کے لیے ایس ایم ایز کی مزاحمت کو صرف ان کی ٹیکس نیٹ کا حصہ بننے سے ہچکچاہٹ سے منسوب کرنا بہت آسان ہے۔ درحقیقت ایک ایسے پروگرام کی ضرورت ہے جو ریگولیٹری کے عمل کو بہتر اور آسان بنائے اور بیوروکریٹک رکاوٹوں کو کم کرنے پرتوجہ دے۔

متعلقہ قوانین کی تعمیل کی لاگت کو کم کرنے اور ٹیکس کے نظام کو ہموار کرنے پر زور دیا جانا چاہیے۔ اس کے علاوہ، نئے رسمی کاروباروں کو ٹیکس مراعات یا چھوٹ فراہم کرنا، تعمیل کے طریقہ کار پر معاونت اور رہنمائی کی پیشکش اور انتظامی امور کو بہتر کرنے کے لیے ٹیکنالوجی کے حل پر بھی غور کیا جانا چاہیے۔

ہماری معیشت کے لیے ایس ایم ای سیکٹر کی اہمیت کوئی مبالغہ نہیں ہے۔ زیادہ تر ایس ایم ایز میں بڑے کاروباروں کے مقابلے میں کم درجے کی آٹومیشن ہوتی ہے، جس کا مطلب ہے کہ وہ بڑے پیمانے پر روزگار دینے والے ادارے ہیں۔

ہماری تیزی سے بڑھتی ہوئی آبادی کی شرح اور جی ڈی پی کی سست شرح نمو کے پیش نظر ایسے کاروباروں کو مدد فراہم کرنے سے معیشت کو متاثر کرنے والی بے روزگاری کے مسئلے کو حل کرنے میں مدد مل سکتی ہے۔

مزید برآں، دستاویزی معیشت میں انکی شمولیت آسان بنانا ٹیکس کی بنیاد کو بڑھانے کیلئے اہم ثابت ہو سکتا ہے۔ دستاویزی معیشت میں ایس ایم ایز کو شمولیت کی ترغیب دینا آگے بڑھنے کیلئے حکومت کے معاشی ایجنڈے کا ایک اہم حصہ بننا چاہیے۔

کاپی رائٹ بزنس ریکارڈر، 2024