سرمایہ کاری کیلئے سعودی عرب کو تعاون کی یقین دہانی

پاکستان نے سعودی عرب کو سپیشل انویسٹمنٹ فیسیلیٹیشن کونسل (ایس آئی ایف سی) کے ذریعے پاکستان میں مملکت کی ممکنہ اربوں ڈالر کی سرمایہ کاری کو تیزی سے ٹریک کرنے میں تعاون اور سہولت کی یقین دہانی کرائی ہے۔

سعودی عرب کے وزیر خارجہ فیصل بن فرحان آل سعود کی قیادت میں اعلیٰ سطحی وفد نے منگل کو منعقدہ سعودی عرب پاکستان سرمایہ کاری کانفرنس میں شرکت کی۔

دفترخارجہ کے جاری بیان میں کہا گیا ہے کہ دونوں ممالک نے وعدوں کو ٹھوس اقتصادی نتائج میں تبدیل کرنے اور سرمایہ کاری سے متعلق معاملات میں دو طرفہ عمل درآمد کے طریقہ کار کو حتمی شکل دیدی۔

بیان کے مطابق، وزیر خارجہ اسحاق ڈار نے ایس آئی ایف سی میں سعودی وفد کا پرتپاک استقبال کیا، پاکستان اور سعودی عرب کے درمیان گہرے تعلقات اور باہمی سٹریٹجک مفادات پر زور دیا۔ انہوں نے دوطرفہ اسٹریٹجک اور اقتصادی شراکت داری کی اہمیت اور تعلقات کو فروغ دینے میں سعودی سرمایہ کاری کے اہم کردار پر روشنی ڈالی۔

انہوں نے بتایا کہ کس طرح ایس آئی ایف سی پلیٹ فارم کے ذریعے پاکستان کا مقصد سرمایہ کاری کے عمل کو ہموار کرنا اور تیزی سے فیصلہ سازی کو یقینی بنانا ہے، جس سے پاکستان میں سرمایہ کاری کے لیے سازگار ماحول کو فروغ ملے گا۔ انہوں نے مزید کہا کہ پاکستان میں زراعت، آئی ٹی اور کان کنی کے شعبوں میں وسیع مواقع موجود ہیں، جس سے سعودی سرمایہ کاروں کوفائدہ اٹھانا چاہیے۔

وزیر خارجہ نے اہم اقتصادی ترقی اور دیرپا فوائد کیلئے دونوں ممالک کے درمیان مضبوط تعلقات پر اعتماد کا اظہار کیا۔ انہوں نے باہمی خوشحالی اور ترقی کے لیے تعمیری تعاون کا مطالبہ بھی کیا۔

ایس آئی ایف سی حکام نے پاکستان کی معیشت کے اہم شعبوں میں ممکنہ سرمایہ کاری کے مواقع پر مشتمل جامع بریفنگ دی۔ دونوں فریقوں نے پاکستان میں سرمایہ کاری کے مواقع کو بہتر بنانے کے لیے اجلاس منعقد کیے۔

جس میں کہا گیا ہے کہ سعودی فریق نے پاکستان میں سرمایہ کاری کے نظام کو بہتر بنانے میں بڑی دلچسپی کا اظہار کیا، سعودی عرب نے سرمایہ کاری/کاروبار سے متعلق مسائل کے حل میں ایس آئی ایف سی کے کردار کو سراہا، اور پاکستان کے اہم شعبوں میں سرمایہ کاری میں گہری دلچسپی ظاہر کی۔

بیان کے مطابق، پاکستان کی جانب سے سعودی فریق کو پاکستان میں مملکت کی ممکنہ اربوں ڈالر کی سرمایہ کاری کو تیزی سے ٹریک کرنے کے لیے زیادہ سے زیادہ تعاون اور سہولت فراہم کرنے کی یقین دہانی کرائی گئی۔“

اپنے خطاب میں وزیر خارجہ اسحاق ڈار نے کہا کہ پاکستان اور سعودی عرب کے درمیان گہرے برادرانہ تعلقات ہیں جو ہمارے اسلامی ورثے اور باہمی سٹریٹجک مفادات سے جڑے ہوئے ہیں۔

انہوں نے کہا کہ سعودی وفد کی یہاں موجودگی دونوں ممالک کے درمیان گہرے اور پائیدار روابط، باہمی احترام، مشترکہ اہداف اور خوشحال مستقبل کے وژن پر مبنی شراکت داری کی نشاندہی کرتی ہے۔

کاپی رائٹ بزنس ریکارڈر،