پاکستان کی بھارتی وزیردفاع کے اشتعال انگیز بیان کی مذمت

دفتر خارجہ نے پاکستان کے اندر بھارت کی خفیہ کارروائیوں کے حوالے سے بھارتی وزیر دفاع راج ناتھ سنگھ کے اشتعال انگیز بیان کی مذمت کی۔

دفتر خارجہ کی ترجمان ممتاز زہرہ بلوچ نے بھارتی وزیر دفاع کے اشتعال انگیز بیان کے جواب میں کہا کہ بھارت کی جانب سے مزید شہریوں کو ماورائے عدالت سزائے موت دینے کا بیان پاکستان کے اندر دہشت گردی کا واضح اعتراف ہے۔

انہوں نے کہا کہ عالمی برادری کے لیے ضروری ہے کہ وہ بھارت کو گھناؤنے اور غیر قانونی اقدامات کے لیے جوابدہ ٹھہرائے۔ انہوں نے نشاندہی کی کہ 25 جنوری 2024 کو، پاکستان نے ناقابل تردید ثبوت فراہم کیے، جو پاکستانی سرزمین پر بھارت کے ماورائے عدالت اور بین الاقوامی قتل عام کی مہم کو واضح کرتے ہیں۔

انہوں نے کہا کہ پاکستان کسی بھی جارحیت کے خلاف پرعزم ہے، جیسا کہ فروری 2019 میں ہندوستان کی دراندازی پر اس کے مضبوط ردعمل سے ظاہر ہوتا ہے، جس نے فوجی برتری کے ہندوستان کے کھوکھلے دعووں کو بے نقاب کر دیا تھا، انہوں نے مزید کہا کہ ہندوستان کی حکمران جماعت انتخابی فائدے کیلئے نفرت انگیز بیان بازی کا سہارا لے کر انتہائی قوم پرستی کے جذبات کو ہوا دیتی ہے۔

انہوں نے کہا، اس طرح کا غیر ذمہ دارانہ رویہ نہ صرف علاقائی امن کو نقصان پہنچاتا ہے بلکہ تعمیری تعاون کے امکانات کو بھی روکتا ہے۔ انہوں نے مزید کہا کہ پاکستان نے ہمیشہ خطے میں امن کے لیے اپنے عزم کا مظاہرہ کیا ہے۔ “تاہم، امن کی ہماری خواہش کو غلط نہیں سمجھا جانا چاہیے۔

واضح رہے کہ ایک بھارتی نیوز چینل کو دیے گئے حالیہ انٹرویو میں بھارتی وزیر دفاع راج ناتھ سنگھ نے کہا کہ بھارت پاکستان میں داخل ہو کر ہر اس شخص کو مارے گا جو ملک میں دہشت گردانہ کارروائیاں کر کے سرحد پار سے فرار ہو جائے گا۔ راجناتھ سنگھ کے تبصرے برطانیہ کے ایک اخبار کی جانب سے ایک رپورٹ شائع کرنے کے ایک دن بعد سامنے آئے ہیں جس میں کہا گیا تھا کہ ہندوستانی حکومت نے غیر ملکی سرزمین پر رہنے والے دہشت گردوں کو ختم کرنے کے وسیع منصوبے کے تحت 2020 سے اب تک پاکستان میں تقریباً 20 افراد کو قتل کیا ہے۔