پاکستان - آئی ایم ایف معاہدہ

دو ہفتے کے پہلے جائزہ مشن کے اختتام کے ٹھیک دس دن بعد بین الاقوامی مالیاتی فنڈ (آئی ایم ایف) نے اپنی ویب سائٹ پر ایک اچھی خبر جاری کی:آئی ایم ایف کے عملے اور پاکستانی حکام کے درمیان پاکستان کے ایکسٹینڈڈ فنڈ فسیلٹی (ای ایف ایف) کے پہلے جائزے اور ریزیلینس اینڈ سسٹینیبلیٹی فسیلٹی (آر ایس ایف) کے تحت ایک نئے انتظام پر عملے کی سطح کا معاہدہ (ایس ایل اے) طے پاگیا ہے۔

جاری ای ایف ایف کے تحت قسط کی ادائیگی تقریباً 1 ارب ڈالر (اسپیشل ڈرائنگ رائٹس 760 ملین) ہوگی، جس سے اب تک کی مجموعی رقم 2 ارب ڈالر تک پہنچ جائے گی، جبکہ ریزیلینس اینڈ سسٹینیبلیٹی فسیلٹی (آر ایس ایف) کے تحت 28 ماہ میں 1.3 ارب ڈالر (ایس ڈی آر 1 ارب) تک رسائی ممکن ہوگی۔

ماضی کے تجربات کی بنیاد پر یہ استدلال پیش کرنے والے کہ آئی ایم ایف نے کچھ پیشگی شرائط عائد کی تھیں، ان کا کہنا ہے کہ 15 سے 25 مارچ کے دوران حکومت کی جانب سے کیے گئے دو اہم فیصلے ممکنہ طور پر آئی ایم ایف مشن کی جانب سے زور دے کر منوائے گئے۔

پہلا فیصلہ ملک کے اعلیٰ اقتصادی پالیسی ساز ادارے یعنی کابینہ کی اقتصادی رابطہ کمیٹی (ای سی سی) نے کیا جس کی سربراہی وزیرخزانہ کررہے تھے۔ کمیٹی نے فیصلہ کیا کہ اسٹیٹ بینک کے 330 ارب روپے کے طویل مدتی فنانسنگ فسیلٹی (ایل ٹی ایف ایف) پورٹ فولیو کو مرحلہ وار ایکسپورٹ-امپورٹ (ایگزم) بینک منتقل کیا جائے گا،اس کے لیے 1.001 ارب روپے کی تکنیکی ضمنی گرانٹ مختص کی گئی تاکہ موجودہ مالی سال کے لیے ایل ٹی ایف ایف سبسڈی کی ضروریات پوری کی جا سکیں۔ اس کے علاوہ، ایگزم بینک مزید 210 ارب روپے کے نئے/اضافی ایل ٹی ایف ایف پورٹ فولیو پر بھی عمل درآمد کرے گا۔

دوسرا فیصلہ بزنس ریکارڈر کی ایک خصوصی رپورٹ میں سامنے آیا، جس میں انکشاف کیا گیا کہ فیڈرل بورڈ آف ریونیو (ایف بی آر) تاجروں اور دکانداروں کے لیے دوبارہ رجسٹریشن مہم شروع کرنے پر سنجیدگی سے غور کررہا ہے۔ یہ مہم گزشتہ سال ترک کردی گئی تھی، جب ایف بی آر کو ملک گیر ہڑتال کی دھمکی دینے والے تاجروں کے ساتھ معاہدہ کرنے پر مجبور ہونا پڑا تھا۔ اس معاہدے کے نتیجے میں انکم ٹیکس آرڈیننس 2001 میں ترامیم کی گئیں، جن کے تحت: سیکشن 236G: ڈسٹری بیوٹنگ ڈیلرز، ہول سیلرز اور کمرشل امپورٹرز کی خریداریوں پر ایڈوانس ٹیکس نان فائلرز کے لیے 2 فیصد سے کم کر کے 0.1 فیصد (فائلرز کے لیے) کر دیا گیا۔ سیکشن 236H: مینوفیکچررز، کمرشل امپورٹرز اور ڈسٹری بیوٹرز کی جانب سے ریٹیلرز کو فروخت پر عائد ایڈوانس ٹیکس نان فائلرز کے لیے 2.5 فیصد سے کم کر کے 0.5 فیصد (فائلرز کے لیے) کر دیا گیا۔ یہ اقدام ٹیکس نیٹ کو وسیع کرنے کے لیے دوبارہ متعارف کرایا جا رہا ہے۔

15 مارچ کو جاری کردہ مشن کے اختتامی بیان میں ”منصوبہ بند مالیاتی استحکام کے ذریعے عوامی قرض کو مستقل طور پر کم کرنے“ کا ذکر کیا گیا تھا، لیکن 25 مارچ کے بیان میں نمایاں طور پر ”محصولات میں اضافے، اخراجات کی مؤثر منصوبہ بندی اور شفافیت، اور ٹیکس نیٹ کو وسعت دینے کے لیے حکام کی مسلسل کوششوں“ پر زور دیا گیا۔25 مارچ کے بیان میں خاص طور پر اس بات کو اجاگر کیا گیا کہ تمام چاروں صوبوں کی جانب سے ترمیم شدہ زرعی انکم ٹیکس نظام کو مؤثر طریقے سے نافذ کرنے کی ضرورت ہے۔

آئی ایم ایف ٹیم نے اپنی اختتامی مشن رپورٹ میں توانائی کے شعبے کی پائیداری کو بہتر بنانے کے لیے لاگت میں کمی سے متعلق اصلاحات میں تیزی کا حوالہ دیا، لیکن ایس ایل اے کی منظوری کے بیان میں اپنی معیاری پالیسی کو دہرایا جو بین الاقوامی سطح پر منظور شدہ ہے لیکن پاکستان پر اس کا زیادہ اطلاق نہیں ہوتا: “لاگت میں کمی سے متعلق اصلاحات میں تیزی لانا ضروری ہے، جن میں تقسیم کے نظام کی بہتری، کیپٹیو پاور کو بجلی کے گرڈ میں شامل کرنا، ٹرانسمیشن سسٹم کو بہتر بنانا، غیر مؤثر پیداواری کمپنیوں کی نجکاری، اور قابل تجدید توانائی کو فروغ دینا شامل ہے۔پاکستانی حکومتوں نے اس حوالے سے غیر مؤثر معاہدے کیے۔

پاکستانی حکومتوں نے آزاد پاور پروڈیوسرز (آئی پی پیز) کے ساتھ غیر دانشمندانہ معاہدوں کی منظوری دی جن میں کیپیسٹی پیمنٹ ڈالر میں طے کی گئیں۔ مزید برآں، بعد کی حکومتوں نے قابل تجدید توانائی کے منصوبوں کی حمایت کی، جو زیادہ تر درمیانی اور اس سے زیادہ آمدنی والے طبقے کے لیے قابل برداشت تھے۔ اس سے قومی گرڈ سے طلب میں کمی واقع ہوئی، جس کے نتیجے میں موجودہ صارفین پر کیپیسٹی چارجز میں اضافہ ہو گیا۔

حکام کے لیے یہ نہایت ضروری ہوگا کہ وہ سالانہ نصف کھرب روپے سے زائد کے ٹیرف ڈیفرینشل سبسڈی کی پالیسی پر نظرثانی کریں۔ یہ سبسڈی نجی کمپنی کےالیکٹرک کو بھی دی جاتی ہے کیونکہ ریگولیٹڈ یونیفارم ٹیرف نافذ ہے جو کسی بھی بجلی کی تقسیم کار کمپنی کی نجکاری کی کوشش کو غیر منطقی بنا دیتا ہے۔

ایس ایل اے کے بیان میں حکومت کی قرض لینے کی پالیسی پر کوئی زور نہیں دیا گیا، بلکہ مکمل توجہ پرائمری سرپلس پر ہے، جو قرضوں کے اخراجات کو شامل کیے بغیر ظاہر کیا جاتا ہے۔ مزید یہ کہ آئندہ بجٹ میں مالی استحکام برقرار رکھنے کے عزم پر زور دیا گیا ہے، جو تشویشناک ہے۔

بیان میں موجودہ اخراجات میں اضافے سے گریز کرنے کا ذکر تو ہے، لیکن یہ سوال پیدا ہوتا ہے کہ آئی ایم ایف ٹیم نے اس سال 21 فیصد اضافہ کیسے منظور کیا، جب کہ مالی گنجائش انتہائی محدود تھی؟ یہ اضافہ دراصل قرضوں کے بڑھتے ہوئے اخراجات، سرکاری ملازمین کی تنخواہوں میں 20 سے 25 فیصد اضافے اور پینشن کے بوجھ میں غیر مستحکم اضافے کی وجہ سے ہوا۔

25 مارچ 2025 کے ایس ایل اے بیان میں وہی نکات دہرائے گئے ہیں جو اکتوبر 2024 میں ای ایف ایف کے ایس ایل اے میں شامل تھے، یعنی پاکستان سَووَرن ویلتھ فنڈ کے لیے مناسب گورننس میکانزم اور حفاظتی اقدامات اپنانا۔ تاہم، اس بار تفصیلی رپورٹ میں ذکر کردہ اسپیشل انویسٹمنٹ فیسلیٹیشن کونسل (ایس آئی ایف سی) کا کوئی حوالہ نہیں دیا گیا، البتہ کاروبار اور سرمایہ کاری کے لیے مساوی مواقع کی ضرورت پر زور دیا گیا ہے۔

آخر میں ایس ایل اے میں اس بات کا ذکر کیا گیا ہے کہ تمام سرکاری اداروں (ایس او ایز) میں گورننس فریم ورک کا نفاذ ادارہ جاتی صلاحیت کو مضبوط کرے گا اور نمایاں بہتری لائے گا۔ (اگرچہ گزشتہ تین دہائیوں میں گورننس بہتر بنانے کی کئی کوششیں کی گئیں، لیکن کوئی مثبت نتیجہ حاصل نہیں ہوا۔) اس کے علاوہ، جامع ترقی کے لیے تجارتی رکاوٹوں کو کم کرنے پر بھی زور دیا گیا ہے، لیکن بدقسمتی سے پاکستان میں تجارتی رکاوٹوں میں نرمی اکثر سنگین ادائیگیوں کے توازن (بیلنس آف پیمنٹ) کے مسائل کو جنم دیتی ہے، جس کے نتیجے میں ملک کو جامع ترقی کی بجائے دوبارہ آئی ایم ایف پروگرام کی طرف جانا پڑتا ہے۔

کاپی رائٹ بزنس ریکارڈر، 2025