قومی بچت اسکیمیں: سی ڈی این ایس نے بیشتر سرٹیفکٹس پر شرح منافع میں اضافہ کردیا

سینٹرل ڈائریکٹوریٹ آف نیشنل سیونگز (سی ڈی این ایس) نے اپنی کئی قومی بچت اسکیموں پر منافع کی شرح میں اضافہ کیا ہے۔

شارٹ ٹرم سیونگ سرٹیفکیٹ (ایس ٹی ایس سی) کی شرح 15 بیسس پوائنٹس (بی پی ایس) اضافے کے بعد 10.81 سے بڑھ کر 10.96 فیصد ہوگئی۔ ڈیفنس سیونگ سرٹیفکیٹس (ڈی ایس سی) پر منافع اب ایک بیسز پوائنٹ بڑھ کر 12.15 فیصد ملے گا۔

اسی طرح پنشنر بینیفٹ اکاؤنٹ، بہود سیونگ سرٹیفکیٹ اور شہدا فیملی ویلفیئر اکاؤنٹ کی شرح 10 بی پی ایس اضافے کے بعد 13.68 فیصد ہوگئی۔

دریں اثنا سروا اسلامک ٹرم اکاؤنٹ (ایس آئی ٹی اے) اور سروا اسلامک سیونگ اکاؤنٹ (ایس آئی ایس اے) کی جانب سے پیش کردہ شرح 70 بیسز پوائنٹس بڑھ کر 9.74 فیصد سے 10.44 فیصد ہوگئی۔

دوسری جانب سیونگ اکاؤنٹ ریٹ پر ریٹرن میں 100 بی پی ایس کمی کی گئی ہے اور اب اس پر 11.5 فیصد کے مقابلے میں 10.5 فیصد ریٹرن دیا جائے گا۔

نیشنل سیونگز آرگنائزیشن پاکستان کا سب سے بڑا مالیاتی ادارہ ہے، جو 3.4 ٹریلین روپے سے زائد کے پورٹ فولیو کا انتظام کرتا ہے اور 12 ریجنل ڈائریکٹوریٹس کے زیر انتظام ملک بھر میں 376 شاخوں کے نیٹ ورک کے ذریعے 4 ملین سے زائد صارفین کو خدمات فراہم کرتا ہے۔

سی ڈی این ایس حکومت کو بجٹ خسارے کی مالی معاونت کرنے اور اہم بنیادی ڈھانچے کے منصوبوں میں مدد کرتا ہے۔

منافع کے گوشواروں میں یہ تبدیلیاں اسٹیٹ بینک آف پاکستان (ایس بی پی) کی مانیٹری پالیسی کمیٹی (ایم پی سی) کی جانب سے پالیسی ریٹ کو 12 فیصد پر برقرار رکھنے کے فیصلے کے بعد کی گئی ہیں۔

ادارہ برائے شماریات پاکستان (پی بی ایس) کے اعداد و شمار کے مطابق فروری 2025 میں سی پی آئی پر افراط زر کی شرح سالانہ بنیادوں پر 1.5 فیصد رہی جو اس سے گزشتہ ماہ 2.4 فیصد تھی۔ یہ 113 ماہ میں سب سے کم ترین سطح ہے۔