پاکستان نے بلال بن ثاقب کو چیف کرپٹو ایڈوائزر مقرر کر دیا

کرپٹو کرنسی کے بارے میں اپنے موقف کو باضابطہ بنانے کی جانب پاکستان کی پیشقدمی جاری ہے۔ حکومت نے بلال بن ثاقب کو پاکستان کرپٹو کونسل کے لئے وزیر خزانہ کا چیف ایڈوائزر مقرر کیا ہے۔

فنانس ڈویژن کی جانب سے جاری بیان میں کہا گیا ہے کہ یہ اقدام ایسے وقت میں سامنے آیا ہے جب پاکستان قومی معیشت، ڈیجیٹل تبدیلی اور سب کے لیے ایک محفوظ اور شفاف مالیاتی نظام سے متعلق ٹھوس پالیسی اقدامات کو یقینی بناتے ہوئے ٹیکنالوجی کی ترقی کو اپنانے کے اپنے عزم کا اعادہ کرنا چاہتا ہے۔

فوربز کی جانب سے تسلیم شدہ ثاقب ویب 3 انویسٹر، اسٹریٹجک ایڈوائزر اور بلاک چین اسپیس میں تھنک لیڈر ہیں اور انہیں 1632 ویں پوائنٹس آف لائٹ ایوارڈ سے بھی نوازا گیا ہے جو برطانوی وزیر اعظم کی جانب سے ملک میں تبدیلی لانے والوں کو ان کی خدمات کے اعتراف میں دیا جاتا ہے۔

انہیں 2023 میں برطانیہ کے نیشنل ہیلتھ سروس کے لیے خدمات کے اعتراف میں ایم بی ای ( ممبر آف دی برٹش ایمپائر) ایوارڈ بھی دیا گیا۔

بیان کے مطابق پاکستان کرپٹو کونسل کے وزیر خزانہ کے چیف ایڈوائزر کے طور پر ثاقب پاکستان کی کوششوں میں اپنی وسیع علم اور تجربے کو شامل کریں گے تاکہ کرپٹو کرنسی اور بلاک چین ٹیکنالوجیز کو مالیاتی نظام میں ضم کیا جا سکے، جبکہ ڈیجیٹل اثاثوں کے لیے ایک مضبوط فریم ورک کی ترقی کو عالمی بہترین طریقوں کے مطابق یقینی بنایا جائے۔

مزید برآں، وہ وزارت خزانہ کو حکومت کی کارکردگی کو بڑھانے، فیصلہ سازی کے عمل کو بہتر بنانے اور سرکاری شعبے کے آپریشنز میں جدت طرازی کو فروغ دینے کے لئے مصنوعی ذہانت (اے آئی) کے استعمال کے بارے میں بھی مشورہ دیں گے۔

وزارت خزانہ نے کہا کہ ثاقب کی تقرری ڈیجیٹل کرنسیوں کی تبدیلی کی صلاحیت کو اپنانے، مالی تحفظ کو یقینی بنانے، خطرات کو کم کرنے، اور کرپٹو کرنسیوں کے پاکستان کی معیشت پر اثرات کا مؤثر انداز میں جائزہ لینے کے عزم میں ایک اہم قدم ہے۔

وزیر خزانہ محمد اورنگ زیب نے ثاقب نثار کی تقرری کا خیر مقدم کیا ہے۔

انہوں نے کہا کہ ثاقب کی تعیناتی ایک محفوظ اور شفاف مالیاتی نظام کو یقینی بناتے ہوئے ابھرتی ٹیکنالوجیز کو اپنانے کے ہمارے عزم کی عکاسی کرتی ہے۔ ہمیں یقین ہے کہ ان کی قیادت ایک مضبوط اور موثر ریگولیٹری فریم ورک کی ترقی کی رہنمائی کرے گی، جس سے پاکستان کے کرپٹو سیکٹر میں جدت طرازی اور پائیدار ترقی کو فروغ ملے گا۔

اپنی تقرری پر تبصرہ کرتے ہوئے ثاقب نے کہا کہ کرپٹو کرنسی اور بلاک چین ٹیکنالوجی میں پاکستان کے لئے بے پناہ امکانات موجود ہیں، خاص طور پر نوجوانوں کے لئے، جو ہمارے ملک کے ڈیجیٹل مستقبل کی محرک قوت ہیں۔ صحیح حکمت عملی اور ریگولیٹری فریم ورک کے ساتھ ہم اپنے ملک کے نوجوانوں کو بااختیار بنا سکتے ہیں، معاشی ترقی کو فروغ دے سکتے ہیں اور پاکستان کو دنیا بھر میں ایک رہنما کے طور پر قائم کر سکتے ہیں۔

وزارت خزانہ کا خیال تھا کہ ثاقب کی تقرری پاکستان کی کوششوں میں ایک اہم کامیابی ہے تاکہ پاکستان کرپٹو کرنسی کے شعبے میں ایک علاقائی رہنما بن سکے اور یہ یقینی بنایا جا سکے کہ وہ اس ابھرتے ہوئے شعبے سے جڑے ضابطے، اقتصادی اور سیکیورٹی کے چیلنجز سے نمٹنے کے لیے تیار ہو۔