اسٹاک مارکیٹ میں تیزی،کے ایس ای 100 انڈیکس 98 ہزارکی سطح عبور کرگیا

پاکستان اسٹاک ایکسچینج (پی ایس ایکس) میں پیر کے روز ملا جلا رجحان دیکھنے میں آیا اوربینکنگ سیکٹرکی نمایاں کارکردگی کی بدولت کے ایس ای 100 انڈیکس تاریخ میں پہلی بار 98 ہزار سے اوپر بند ہوا۔

کے ایس ای 100 نے کاروبار کا آغازمنفی زون میں کیا اور صبح 9 بج کر 40 منٹ پر 97,137.63 کی کم ترین سطح پر پہنچ گیا۔

تاہم بعد ازاں سرمایہ کاروں کی جانب سے بھرپور خریداری کی وجہ سے انڈیکس 99,000 کی سطح عبورکرگیا۔ کاروبارکے دوران انڈیکس 99,317.47 پوائنٹس کی بلند ترین سطح پرپہنچ گیا تاہم بعد میں یہ 99,000 سے کم ہوگیا ۔

کاروباری روز کے اختتام پر بینچ مارک انڈیکس گزشتہ روزکی بندش کے مقابلے میں 281.55 پوائنٹس یا 0.29 فیصد اضافے کے ساتھ 98,079.78 پر بند ہوا۔

کمرشل بینکوں، فرٹیلائزر اور فارماسیوٹیکل کمپنیوں نے ایچ بی ایل، این بی پی، ایم ای بی ایل، یو بی ایل، ایم سی بی، حبکو، پی ایس او، ایس ایس جی سی اور ایف ایف سی کے ساتھ مثبت زون میں سب سے آگے ہیں۔

دریں اثنا سرمایہ کار مقامی محاذ پرسیاسی اتارچڑھاؤ کا بھی اندازہ لگا رہے ہیں۔

واضح رہے کہ پاکستان تحریک انصاف (پی ٹی آئی) کے جیل میں قید بانی چیئرمین اور سابق وزیراعظم عمران خان کے ہزاروں پرجوش حمایتیوں نے اتوار کو وفاقی دارالحکومت کی جانب ”فیصلہ کن“ لانگ مارچ کا آغاز کردیا ہے اور حکومت کی جانب سے ان کا راستہ روکنے کیلئے لگائی گئی تمام رکاوٹوں کو ہٹادیا گیا۔

لانگ مارچ کو ناکام بنانے کے لیے پولیس نے جڑواں شہروں راولپنڈی اور اسلام آباد سے پی ٹی آئی کے سیکڑوں حامیوں کو گرفتار کرلیا ہے ۔

گزشتہ ہفتے مقامی سرمایہ کاروں کی جانب سے جارحانہ خریداری اور ادارہ جاتی حمایت کی وجہ سے تیزی کا رجحان دیکھا گیا۔

بینچ مارک کے ایس ای 100 انڈیکس میں ہفتہ وار 3,034.59 پوائنٹس کا اضافہ ہوا اور ہفتے کا اختتام 97,798.23 پوائنٹس کی بلند ترین سطح پر ہوا۔

عالمی سطح پر پیر کو ایشیائی اسٹاکس میں اضافہ دیکھا گیا، ساتھ ہی امریکی ایکویٹی فیوچرز بھی بڑھے، جبکہ ڈالر اپنے حریف کرنسیوں کے مقابلے میں پیچھے ہٹ گیا کیونکہ بانڈ کے منافع میں میں کمی واقع ہوئی ۔ یہ تبدیلی اس وقت آئی جب فنڈ منیجر اسکاٹ بیسنٹ کو اگلے امریکی وزیر خزانہ کے طور پر منتخب کیا گیا، جس سے سرمایہ کاروں کو توقع ہے کہ وہ واشنگٹن میں مارکیٹس کے حق میں آواز بلند کریں گے۔

ایم ایس سی آئی کے ایشیا پیسیفک کے حصص کے وسیع ترین انڈیکس میں 1.6 فیصد کا اضافہ ہوا اور یو ایس ایس اینڈ پی 500 فیوچرز نے 0.5 فیصد اضافے کی نشاندہی کی ، جو گزشتہ ہفتے کے اختتام پرکیش انڈیکس میں 0.3 فیصد اضافے کے بعد ریکارڈ سطح پرپہنچ گیا تھا۔

آل شیئر انڈیکس کا حجم جمعہ کے روز 1,249.09 ملین سے گھٹ کر 640.26 ملین رہ گیا۔

حصص کی مالیت گزشتہ سیشن کے 45.47 ارب روپے سے کم ہو کر 25.62 ارب روپے رہ گئی۔

ہیسکول پیٹرول 64.82 ملین حصص کے ساتھ سب سے آگے رہا، اس کے بعد کنرجیکو پی کے 48.06 ملین حصص کے ساتھ اور فوجی فوڈز لمیٹڈ 40.92 ملین حصص کے ساتھ تیسرے نمبر پر رہا۔

پیر کو 460 کمپنیوں کے حصص کا کاروبار ہوا جن میں سے 220 کمپنیوں کے حصص کی قیمتوں میں اضافہ، 185 میں کمی جبکہ 55 میں کوئی تبدیلی نہیں ہوئی۔