شیری رحمان کی امریکی ارکان کانگریس کے خط پر تنقید

پاکستان پیپلز پارٹی (پی پی پی) کی نائب صدر سینیٹر شیری رحمان نے امریکی کانگریس ارکان کی جانب سے صدر بائیڈن کو بھیجے گئے خط پر ردعمل دیتے ہوئے کہا ہے کہ پاکستان تحریک انصاف (پی ٹی آئی) عمران خان کی رہائی کی کوششوں میں غیر ملکی مداخلت کو مسلسل دعوت دے رہی ہے۔

سینیٹر شیری رحمان نے ہفتے کے روز زور دے کر کہا کہ امریکی کانگریس کے ارکان کی جانب سے صدر بائیڈن کو لکھے گئے خط سے ’حقیقی آزادی‘ کے بیانیے کو ایک اور دھچکا لگا ہے۔ یہ خط پاکستان کے اندرونی معاملات میں واضح مداخلت کی نمائندگی کرتا ہے اور کسی دوسرے ملک کے سیاسی اور قانونی معاملات میں اس طرح کی مداخلت بین الاقوامی اصولوں کی خلاف ورزی ہے۔

عمران خان کے حوالے سے امریکی کانگریس کے ارکان کی جانب سے صدر بائیڈن کو لکھے گئے خط سے نہ صرف پاکستان کی عدلیہ اور سیاسی نظام کی خودمختاری کو چیلنج کیا گیا ہے بلکہ ایک خطرناک مثال بھی قائم کی گئی ہے جس سے یہ اشارہ ملتا ہے کہ کچھ ممالک دوسرے ممالک کے اندرونی معاملات میں مداخلت کرنا قابل قبول سمجھ سکتے ہیں۔

ایک بیان میں انہوں نے کہا کہ پی ٹی آئی کی جانب سے امریکا میں پاکستان کے خلاف لابی کرنے کی کوششیں بھی انتہائی قابل مذمت ہیں۔ یہ وہی سیاسی جماعت ہے جس نے ماضی میں ’امریکی مداخلت‘ کی مذمت کرکے سیاسی فائدہ اٹھایا تھا۔ اب وہ اسی طرح کی غیر ملکی مداخلت کا سہارا لے رہے ہیں، جو دوہرے معیار کو بے نقاب کرتی ہے۔

کاپی رائٹ بزنس ریکارڈر، 2024