ناقص حکمرانی، کمزور معیشت

فنانشل مارکیٹ قائم ہونے کے 60 سال بعد بھی، مقامی کمپنیاں مارکیٹ کا صرف 30 فیصد حصہ بناتی ہیں۔ کے ایس ای 100انڈیکش پر 31 خاندانی ملکیت والی کمپنیاں حاوی ہیں، جہاں مالکان انتظامیہ پر مضبوط گرفت رکھتے ہیں۔ یہ کہا جا سکتا ہے کہ ان مالکان کے پاس حصص کی ایک بڑی مقدار ہونے کی وجہ سے لیکویڈیٹی، تجارتی حجم اور مارکیٹ کی کارکردگی کم ہوتی ہے۔

اس کے نتیجے میں کم فری فلوٹ حصص تجارت کے لیے دستیاب ہوتے ہیں۔ علاقائی ممالکت کے مقابلے میں، پاکستان کا کاروباری بازار جکڑا ہوا ہے۔پی آئی ڈی ای ان تھنک ٹینکس میں سے ایک ہے جہاں محققین نے ڈاکٹر ندیم الحق کی سرپرستی میں مختلف پلیٹ فارمز پر اس مسئلے کو اٹھایا ہے۔

زیادہ تحفظ پسندی، اجازت نامے اور لائسنسنگ کی ضروریات، سخت حکومتی اثرات اور ضابطے، اور خاندان کے زیر انتظام کاروباری گروہوں کی اجارہ داری وہ رکاوٹیں ہیں جنہوں نے پاکستان میں کاروبار کے پھیلاؤ اور پیداواریت کے امکانات کو محدود کیا ہے۔

خاندانی ملکیت والی کمپنیوں کے غالبے کا تعلق مسابقتی منڈیوں کی کمی اور حکومت کی غلط تحفظاتی اور سبسڈی پالیسیوں سے ہے، جس کے نتیجے میں پیشہ ورانہ ترقی کا ماحول نہیں پنپ سکا۔ خاندانی ملکیت والی کمپنیوں سے وابستہ ایک بنیادی عنصر ان کمپنیوں میں ملکیت اور بورڈ آف ڈائریکٹرز کی تشکیل کا مظہر ہے۔

نجی شعبے کے برعکس، جہاں مسابقتی ماحول یہ یقینی بناتا ہے کہ سب سے قابل افراد بغیر کسی دشواری کے اہم فیصلہ سازی کے عہدوں پر پہنچ جائیں، خاندانی ملکیت والی کمپنیوں میں قیادت نیٹ ورک کلسٹرنگ کا نتیجہ ہوتی ہے۔

کاروباری نظام 31 بنیادی خاندانوں کے ارکان پر مشتمل ہے جو ڈائریکٹرشپ کی پوزیشنوں پر فائز ہو کر مارکیٹ کے حالات کو کنٹرول کرتے ہیں۔ خاندانی ملکیت والی کمپنیوں میں ایک عام رواج اپنے نیٹ ورک سے جڑے رہنا ہے۔ ان کمپنیوں کے بورڈ آف ڈائریکٹرز کا کنٹرول ایک چھوٹے گروہ کے ہاتھ میں ہوتا ہے جو اپنے کلب کے باہر سے کچھ قابل افراد کو بورڈ میں شامل کرنے سے گریزاں ہوتے ہیں۔

نیٹ ورک کے تجزیے سے پتہ چلتا ہے کہ ڈائریکٹر شپ پر فائز افراد اپنے اشرافیہ کلب کا حصہ ہوتے ہیں۔ ایک مطالعہ سے معلوم ہوتا ہے کہ مرکزی پوزیشن پر فائز ہر ڈائریکٹر کم از کم 10 بار یا اس سے زیادہ متوازی کمپنیوں میں ایک جیسے عہدوں پر فائز رہے ہیں، اور کچھ نے 17 بار تک ایسے عہدوں پر خدمات انجام دی ہیں۔

اس سے ظاہر ہوتا ہے کہ یہ کمپنیاں اہم بورڈ پوزیشنوں کے تقرر کے لیے آزادانہ طریقہ کار کو یقینی بنانے کی پرواہ نہیں کرتی ہیں۔ کارپوریٹ سیکٹر میں جمہوری اصولوں کی کمی، شفافیت کے اقدامات، احتساب کے نظام، اور میرٹ پر مبنی طریقوں کا فقدان ہے، اور کمپنیاں شاذ و نادر ہی کوڈ آف کارپوریٹ گورننس پر عمل کرتی ہیں۔

بورڈ کے ارکان زیادہ تر مرد ہوتے ہیں، اور خواتین کی نمائندگی انتہائی کم ہوتی ہے۔ ’سیٹھ‘ کلچر کی نوآبادیاتی باقیات کی رنگت اس قدر گہری ہے کہ ایک بڑا حصہ اپنی انتظامیہ کو پیشہ ورانہ بنانے کے لیے تیار نہیں اور زیادہ سے زیادہ فوائد حاصل کرنے کے لیے جمود برقرار رکھنا چاہتا ہے۔

ان کمپنیوں کی انتظامیہ ایک پسماندہ وژن کی حامل ہے۔ ان کا کلچر کارپوریٹ دوراندیشی سے محروم ہے، اور طویل مدتی منصوبہ بندی کی کمی ہے۔ بورڈز عام طور پر اشرافیہ کے کلب جیسے کارپوریشنز، کاروباری بانیوں کے خاندان کے افراد، مسلح افواج کے ریٹائرڈ اہلکاروں، ریٹائرڈ اور فعال سول ملازمین، اور غیر ایگزیکٹو ڈائریکٹرز کے ایک بڑے حصے پر مشتمل ہوتے ہیں جن کا حکومتی سطح پر کوئی تجربہ ہوتا ہے۔

بیوروکریٹس اور حکومتی اہلکاروں کو کاروباری بورڈز میں انڈیپنڈنٹ ڈائریکٹر کے طور پر تعینات کرنے سے ترجیحات، حکمت عملیوں، علم، صلاحیتوں، اور کارپوریٹ اور بیوروکریٹک شعبوں کے درمیان نقطہ نظر میں فرق پیدا ہوتا ہے۔

ایک بار جب ان اہلکاروں کو تعینات کیا جاتا ہے تو وہ اس مسابقتی اور متحرک کارپوریٹ شعبے میں بہتر طریقے سے کام نہیں کر پاتے۔ یہ سرکاری ملکیت والے اداروں کے ایکٹ 2023 کے بھی خلاف ہے، جو بیوروکریٹس کو انڈیپنڈنٹ بورڈ آف ڈائریکٹرز کے طور پر تعینات کرنے سے روکتا ہے۔

کمزور گورننس کا ہمیشہ ایک معاشی نقصان ہوتا ہے، اس لیے گورننس کے نظام کو دوبارہ تشکیل دینے کی ضرورت ہے۔

مختصر یہ کہ پاکستانی کمپنیاں بنیادی طور پر خاندانی ملکیت والی ہیں، جو سست ترقی دکھاتی ہیں اور زیادہ تر فہرست میں شامل نہیں ہیں۔ صرف چند کمپنیاں اسٹاک مارکیٹ میں 2 بلین ڈالر سے زیادہ کی مالیت رکھتی ہیں، جبکہ عالمی سطح پر اربوں ڈالر کی بہت سی کمپنیوں کی موجودگی اس بات کا اشارہ ہے کہ پاکستان میں ناقص کاروباری پالیسی سازی اور گورننس کی خراب حالت ہے، جیسا کہ پی آئی ڈی ای اور ڈاکٹر ندیم الحق نے درست طور پر نشاندہی کی ہے۔

اس کی بڑی وجہ حکومتی اثرات اور غیر ضروری اور غیر متعلقہ ضابطوں کا بوجھ ہے۔ حکومت کی جانب سے دی گئی آسان سہولتیں جیسے درآمدی متبادل، مواقع اور سبسڈیز انہیں عالمی سطح پر مقابلہ کرنے کے قابل نہیں بناتیں۔ کم ضابطوں والی منڈیوں میں کمپنیوں کو ترقی کرنے اور بڑھنے کے لیے منصفانہ مسابقتی ماحول فراہم کیا جا سکتا ہے۔

مختصر یہ کہ اقتصادی سرگرمیوں میں پائے جانے والے موجودہ جمود کی وجوہات متعدد ہیں جو ساختی، ادارہ جاتی اور ثقافتی عوامل میں جڑی ہوئی ہیں۔ ملک میں مستحکم اقتصادی ترقی کو یقینی بنانے کے لیے ہر سطح پر اصلاحات کی اشد ضرورت ہے۔ پائیدار اقتصادی ترقی کے لیے ضروری ہے کہ میرٹ پر مبنی طریقوں کو ترجیح دی جائے، شفافیت کی حوصلہ افزائی کی جائے، جدت کے کلچر کو فروغ دیا جائے، بین الاقوامی بہترین طریقوں سے سیکھا جائے، مسابقت، نجکاری، قرض کی فراہمی اور تحقیق و ترقی کو فروغ دیا جائے وغیرہ۔

کاپی رائٹ بزنس ریکارڈر، 2024