آئی ایم ایف شرط، کیپٹو پاور پلانٹس کی گیس منقطع کرنے کا عمل شروع

باخبر ذرائع نے بزنس ریکارڈر کو بتایا کہ ڈائریکٹوریٹ جنرل آف گیس (پیٹرولیم ڈویژن) کی باضابطہ ہدایات اور کے-الیکٹرک ( کے ای) اور ڈسکوز سے موصولہ ڈیٹا کی روشنی میں ملک کی دونوں گیس یوٹیلیٹی کمپنیوں نے کیپٹو پاور پلانٹس (سی سی پیز) کو گیس کی فراہمی منقطع کرنے کا عمل شروع کر دیا ہے۔

سرکاری دستاویزات کے مطابق، اس وقت کل 1180 کیپٹو یونٹس (برآمدی) ہیں، جن میں سے 383 ایس این جی پی ایل کے نظام پر ہیں، جبکہ 797 ایس ایس جی سی ایل کے نیٹ ورک پر ہیں۔

تخمینی مقامی گیس کی کھپت دونوں گیس یوٹیلیٹی کمپنیوں کے نظام پر 242 ایم ایم سی ایف ڈی ہے، جس میں سے 59 ایم ایم سی ایف ڈی ایس این جی پی ایل پر، جبکہ 183 ایم ایم سی ایف ڈی ایس ایس جی سی ایل نیٹ ورک پر ہے۔

تخمینی آر ایل این جی کی کھپت 156 ایم ایم سی ایف ڈی ہے (114 ایم ایم سی ایف ڈی ایس این جی پی ایل پر اور 42 ایم ایم سی ایف ڈی ایس ایس جی سی ایل پر)۔

عالمی مالیاتی فنڈ (آئی ایم ایف) کے ساتھ کیے گئے معاہدے کے مطابق جنوری 2025 تک کیپٹو پاور پلانٹس کو گیس گرڈ سے نکالنے کے لیے، کیپٹو پاور پلانٹس کے لیے ٹیرف یکم جولائی 2024 سے 2,750 روپے/ایم ایم بی ٹی یو سے بڑھا کر 3,000 روپے/ایم ایم بی ٹی یو کر دیا گیا ہے۔

اسی دوران، پاور ڈویژن نے کیپٹو پاور یونٹس کا ایک سروے اور لوڈ اسسمنٹ بھی کیا ہے، اور ان یونٹس کو پاور گرڈ سے منسلک کرنے کے لیے وقتاً فوقتاً ایک منصوبہ بنایا ہے۔

اس سلسلے میں ڈیٹا بھی پیٹرولیم ڈویژن کے ساتھ شیئر کیا گیا ہے۔ سوئی نادرن گیس پائپ لائن کمپنی لمیٹڈ (ایس این جی پی ایل) اور سوئی سدرن گیس پائپ لائن کمپنی (ایس ایس جی سی ایل) کے منیجنگ ڈائریکٹرز اور چیف ایگزیکٹو آفیسر (سی ای او) پاور پلاننگ اینڈ مانیٹرنگ کمپنی (پی پی ایم سی) کو ڈپٹی ڈائریکٹر (ٹیکنیکل) ڈائریکٹوریٹ جنرل آف گیس، صلاح الدین خان نے خطوط بھیجے ہیں، جس میں 12 ستمبر 2024 کو وزیر توانائی سردار اویس احمد خان لغاری اور وزیر پیٹرولیم ڈاکٹر مصدق مسعود ملک کی زیر صدارت اجلاسوں میں ہونے والی گفتگو کا حوالہ دیا گیا ہے، جس میں گیس پر مبنی سی سی پیز کی پاور گرڈ پر منتقلی کے بارے میں بات چیت کی گئی۔

ڈپٹی ڈائریکٹر (ٹیکنیکل) کے مطابق، بعد کی میٹنگ میں طے شدہ معاملات کی بنیاد پر، پاور ڈسکوز، بشمول کے ای/پی پی ایم سی، سی سی پیز کا ڈیٹا جمع کریں گے اور گیس یوٹیلیٹی کمپنیوں کے ساتھ مندرجہ ذیل مراحل میں شیئر کریں گے: (i) سی سی پیز جو فوری طور پر بغیر کسی اضافی انفرااسٹرکچر کے پاور گرڈ پر منتقل ہو سکتے ہیں؛ (ii) سی سی پیز جنہیں قلیل مدت میں گرڈ پر منتقل کرنے کے لیے کم سے کم اضافی انفرااسٹرکچر درکار ہے؛ (iii) سی سی پیز جنہیں درمیانی مدت میں اضافی انفرااسٹرکچر درکار ہے؛ (iv) سی سی پیز جنہیں طویل مدت میں اضافی انفرااسٹرکچر درکار ہے؛ اور (v) سی سی پیز جو گرڈ سے منسلک نہیں ہیں یا وہیلنگ کے تحت کام کر رہے ہیں؛ یعنی صنعتی اسٹیٹس/زونز۔

ڈائریکٹوریٹ آف گیس (پیٹرولیم ڈویژن) نے ڈسکوز، بشمول کے ای/پی پی ایم سی، سے درخواست کی کہ وہ فوری طور پر ضروری کارروائی کریں۔

کے الیکٹرک اور ڈسکوز سے کہا گیا ہے کہ جیسے ہی پاور ڈسٹریبیوشن کمپنیوں سے سی سی پیز کا ڈیٹا موصول ہو جائے، دونوں گیس کمپنیاں ایک منصوبہ تیار کریں گی، جس میں وقت کی حد بھی شامل ہو گی، تاکہ منگل؛ یعنی 24 ستمبر 2024 تک ڈس کنکشن کے نوٹس بھیجے جا سکیں اور اس کے بعد فزیکل ڈس کنکشن کیے جائیں۔

وزارت خزانہ نے مبینہ طور پر پیٹرولیم ڈویژن سے ایسا میکانزم طلب کیا ہے جو اس بات کی ضمانت دیتا ہو کہ صنعت کو الاٹ کی گئی گیس (پروسیس) صرف مقررہ مقاصد کے لیے استعمال ہو گی اور پاور جنریشن کے لیے استعمال نہیں ہو گی۔

یہ ضمانت پیٹرولیم ڈویژن کی سمری کی حتمی منظوری کا حصہ ہو گی، تاکہ پروسیسنگ انڈسٹری کو گھریلو صارفین اور کمرشل سیکٹر کے برابر قرار دیا جائے اور سی سی پیز کو سی این جی سیکٹر کے برابر کر دیا جائے۔

پیٹرولیم ڈویژن کا مؤقف تھا کہ گیس سپلائی کی ترجیحات میں تبدیلی اور کیپٹو پاور یونٹس کے لیے گیس ٹیرف میں بتدریج اضافہ ان یونٹس کو پاور گرڈ پر منتقلی کے قابل بنائے گا۔ اس مسئلے پر ایس آئی ایف سی کی ایپیکس کمیٹی کے اجلاس میں 2 فروری 2024 کو گفتگو ہوئی، جس نے گیس سپلائی کی ترجیحی ترتیب پر نظرثانی کی توثیق کی۔

اس کے مطابق، پیٹرولیم ڈویژن نے اقتصادی رابطہ کمیٹی (ای سی سی) کی منظوری کے لیے درج ذیل تجاویز تیار کیں: (i) موجودہ گیس الاٹمنٹ/ترجیحات میں ترمیم کی جائے گی اور صنعتی استعمال (پروسیس) کو اپ گریڈ کیا جائے گا اور گھریلو اور کمرشل سیکٹر کو پہلی ترجیح میں رکھا جائے گا؛ اور (ii) موجودہ گیس الاٹمنٹ/ترجیحات میں ترمیم کی جائے گی اور صنعتی استعمال (کیپٹو) کو نیچے کر دیا جائے گا اورسی این جی سیکٹر کے ساتھ رکھا جائے گا۔ ای سی سی اور وفاقی کابینہ، دونوں نے پیٹرولیم ڈویژن کی سفارشات کی منظوری دے دی ہے۔

کاپی رائٹ بزنس ریکارڈر، 2024