روس کے ساتھ تجارت: اسٹیٹ بینک کو ٹرانزیکشن سیٹلمنٹ کو بہتر بنانیکی ہدایت

منصوبہ بندی کمیشن کے باخبر ذرائع نے بزنس ریکارڈر کو بتایا کہ وزیر منصوبہ بندی احسن اقبال کی سربراہی میں روس سے متعلق ایک اعلیٰ سطح کمیٹی نے مرکزی بینک (اسٹیٹ بینک آف پاکستان) کو ہدایت دی ہے کہ وہ بینکوں اور بڑے برآمد کنندگان کے ساتھ مشاورت کرے تاکہ روس کے ساتھ تجارت کے حوالے سے لین دین کی ترتیبات تیار کی جا سکیں۔

کمیٹی نے اس سلسلے میں کئی اجلاس منعقد کیے لیکن وش لسٹ کو ابھی تک حتمی شکل نہیں دی گئی ہے جس پر ماسکو کے ایک اعلی سطح دورے کے دوران تبادلہ خیال زیر التوا ہے۔ روس میں پاکستان کے سفیر خالد جمالی روس کے ساتھ مستقبل کے تعلقات کے حوالے سے مختلف فورمز پر زیر بحث مختلف ایجنڈا آئٹمز پر اپنی رائے دینے کے لیے اسلام آباد میں موجود ہیں۔

ذرائع کا کہنا ہے کہ 6 اگست 2024 کو وزیر منصوبہ بندی کی زیر صدارت ہونے والے چھٹے اجلاس میں کمیٹی کو بتایا گیا کہ وزیراعظم شہباز شریف دورہ روس کی تیاریوں پر اجلاس بلا سکتے ہیں اور اس بات پر زور دیا کہ ہر وزارت مختصر نوٹس پر روس کے ساتھ روابط کے روڈ میپ پر وزیراعظم کو پریزنٹیشن دینے کے لیے تیار رہے۔

تفصیلی غوروخوض کے بعد کمیٹی نے مندرجہ ذیل فیصلے کیے: (1) تمام وزارتیں / ڈویژن وزیراعظم کے جائزہ اجلاس کیلئے جامع پریزنٹیشن تیار کریں ، روس کے ساتھ مصروفیات کیلئے اپنے حکمت عملی کے پیپر / روڈ میپ کو جلد از جلد ترتیب دیں اور کمیٹی کے اب تک کے تمام فیصلوں پر سختی سے عمل درآمد کو یقینی بنائیں۔ (ii) ہر وزارت خود وزیر اعظم کے جائزہ اجلاس میں ایک پریزنٹیشن پیش کرے گی۔ (iii) اسٹیٹ بینک تمام بینکوں اور معروف برآمد کنندگان کے ساتھ ایک اجلاس طلب کرے تاکہ روس کے ساتھ لین دین کے تصفیے کے لئے جدید، غیر منظور شدہ اور تخلیقی طریقوں کی نشاندہی کرنے کے لئے ٹھوس منصوبہ تیار کیا جاسکے جیسے برکس نیو ڈیولپمنٹ بینک کا ماڈل؛ (iv) وزارت ریلوے پاکستان ایران ترکیہ روٹ پر مسافروں کے سفر کے حوالے سے فزیبلٹی اسٹڈی کرے گی اور جدید حل پیش کرنے کے لئے انجینئرنگ یونیورسٹیوں کے ساتھ مل کر ملٹی گیج آپشنز بھی تلاش کرے گی۔ (5) وزارت آبی وسائل ایک دوسرے سے جڑے منصوبوں کے لئے پاور ڈویژن سے مشاورت کرے اور روڈ میپ میں تضادات سے بچنے کے لئے تجاویز کو ترتیب دے۔ اور (6) وزارت بین الصوبائی رابطہ (آئی پی سی) صوبوں کے ساتھ تعاون کرے گی اور وزیر اعظم کے لئے ایک مربوط پریزنٹیشن تیار کرے گی۔

اجلاس میں وفاقی وزیر برائے آبی وسائل ڈاکٹر مصدق ملک، وزیراعظم کے معاون خصوصی طارق فاطمی، کوآرڈینیٹر رانا احسان افضل، مختلف متعلقہ وزارتوں کے سیکرٹریز اور سینئر حکام نے شرکت کی۔

کاپی رائٹ بزنس ریکارڈر، 2024