نواز شریف مسلم لیگ (ن) کے صدر منتخب

آج نیوز کے مطابق، سابق وزیراعظم نواز شریف پاکستان مسلم لیگ (ن) کے صدر منتخب ہوگئے۔

واضح رہے کہ نواز شریف کو 2018 میں اس وقت کے چیف جسٹس آف پاکستان میاں ثاقب نثار کی سربراہی میں سپریم کورٹ کے ایک بینچ کے فیصلے کے بعد پارٹی صدر کے عہدے سے ہٹا دیا گیا تھا جس میں کہا گیا تھا کہ آئین کے آرٹیکل 62 اور 63 کے تحت نااہل قرار دیا گیا فرد کسی سیاسی جماعت کا سربراہ نہیں رہ سکتا۔

دریں اثناء مسلم لیگ ن کے صدر کے انتخاب کے لیے 11 افراد نے کاغذات نامزدگی حاصل کیے جن میں بشیر میمن، انوار الحق صدیقی، اسحاق ڈار، راجہ محمد فاروق، حافظ حفیظ الرحمان اور شاہ غلام قادر شامل ہیں۔

مسلم لیگ ن کی جنرل کونسل کے اجلاس میں نواز شریف کا انتخاب کیا گیا۔ نواز شریف اب اپنے چھوٹے بھائی وزیر اعظم شہباز شریف کی جگہ پارٹی کی صدارت سنبھالیں گے، جنہوں نے پہلے یہ کہتے ہوئے استعفیٰ دے دیا تھا کہ وقت آ گیا ہے کہ ان کے بھائی پارٹی صدر کے طور پر اپنی صحیح جگہ دوبارہ آئیں۔