اسلامک بینک کے صدر کا پاکستان میں پراجیکٹس کو جلد مکمل کرنے کے عزم کا اظہار

ریڈیو پاکستان نے اتوار کو رپورٹ کیا کہ اسلامی ترقیاتی بینک (آئی ڈی بی) نے پاکستان میں اپنے منصوبوں کو جلد از جلد مکمل کرنے کا عزم ظاہر کیا ہے۔

ان خیالات کا اظہار صدر اسلامی ترقیاتی بینک ڈاکٹر محمد سلیمان الجاسر نے سعودی عرب کے دارالحکومت ریاض میں وزیراعظم محمد شہباز شریف سے عالمی اقتصادی فورم کے خصوصی اجلاس کے موقع پر ملاقات کے دوران کیا۔

اجلاس میں جاری منصوبوں پر پیش رفت کا جائزہ لیا گیا اور پاکستان اور اسلامی ترقیاتی بینک کے درمیان مستقبل میں تعاون کے مواقع پر غور کیا گیا۔

وزیراعظم نے پاکستان میں سرمایہ کاری پر اسلامی ترقیاتی بینک کا شکریہ ادا کیا اور 2022 کے سیلاب کے بعد بحالی میں بینک کی مدد کو سراہا۔

انہوں نے کہا کہ پاکستان کے ساتھ بینک کی نتیجہ خیز شراکت داری حکومت کے پائیدار ترقی کے اہداف کے حصول کے ساتھ ساتھ تعمیر نو اور روزگار کے مواقع فراہم کرنے میں اہم کردار ادا کرتی ہے۔

شہباز شریف نے اس بات پر روشنی ڈالی کہ اسپیشل انویسٹمنٹ فیسیلیٹیشن کونسل ملک میں غیر ملکی سرمایہ کاری کو بڑھانے، غیر ملکی سرمایہ کاروں کے تمام خدشات کو دور کرنے اور ون ونڈو آپریشنز فراہم کرنے کے لیے مکمل طور پر فعال ہے۔

اس موقع پر اسلامی ترقیاتی بینک کے صدر نے کہا کہ پاکستان بینک کا ایک اہم رکن ہے اور قدرتی اور آبی وسائل سے مالا مال ہے۔

انہوں نے کہا کہ پاکستان کی بڑی افرادی قوت ایک اثاثہ ہے جس کا بہترین استعمال کیا جانا چاہیے۔