وزیر خارجہ اسحاق ڈار نے سعودی عرب کو پاکستان میں سرمایہ کاری کے حوالے سے مکمل سہولت فراہم کرنے کی یقین دہانی کرائی ہے ۔
وزیرخارجہ شہزادہ فیصل بن فرحان السعود کی قیادت میں سعودی وفد کے ساتھ آج اسلام آباد میں خصوصی سرمایہ کاری سہولت کونسل (ایس آئی ایف سی) کے اجلاس سے خطاب کرتے ہوئے وزیر خارجہ نے اس عزم کا اعادہ کیا کہ پاکستان میں سعودی سرمایہ کاری کو انتہائی قدر اور ادارہ جاتی نظام کے ذریعے بروئے کار لایا جائے گا۔
وزیر خارجہ نے کہا کہ دونوں برادر ممالک کے درمیان تعلقات باہمی تعاون کی کوششوں سے مزید مضبوط ہوں گے۔
انہوں نے وفد کو یقین دلایا کہ پاکستان میں سعودی سرمایہ کاری باہمی ترقی اور خوشحالی کے لیے بھی مددگار ثابت ہوگی۔
انہوں نے کہا کہ سعودی سرمایہ کاری علاقائی امن و استحکام کے لیے بھی اہم کردار ادا کرے گی۔
زراعت، توانائی اور کان کنی سمیت مختلف شعبوں میں سرمایہ کاری کے امکانات کو اجاگر کرتے ہوئے انہوں نے کہا کہ ہمارا مقصد پاکستان کو اقتصادی سرگرمیوں اور جدت کے مرکز میں تبدیل کرنا ہے، جس سے عالمی سرمایہ کاروں بالخصوص ہمارے سعودی بھائیوں کے لیے پرکشش ماحول پیدا کیا جائے۔
اسحاق ڈار نے کہا کہ خصوصی سرمایہ کاری سہولت کونسل اس بات کو یقینی بنائے گی کہ سرمایہ کاری کا عمل تیز اور باہمی طور پر فائدہ مند ہوں، جو پاکستان میں براہ راست بیرونی سرمایہ کاری میں سہولت فراہم کرنے کے ہمارے عزم کی عکاسی کرتا ہے۔
قبل ازیں وزیراعظم شہباز شریف نے کہا کہ پاکستان اور سعودی عرب کو ملک میں سعودی سرمایہ کاری کے پہلے مرحلے کو تیز کرنے کے لیے مل کر کام کرنے کی ضرورت ہے۔
یہ پیشرفت ان دنوں سامنے آئی ہے جب دونوں ممالک نے 5 ارب ڈالر کے سرمایہ کاری پیکج کو تیزی سے آگے بڑھانے کے عزم کا اظہار کیا تھا۔
Comments
Comments are closed.