وفاقی وزیر برائے نیشنل فوڈ سیکیورٹی اینڈ ریسرچ رانا تنویر حسین نے کہا ہے کہ ملک میں صارفین کی طلب کو پورا کرنے کے لیے چینی کا وافر ذخیرہ موجود ہے۔
انہوں نے کہا کہ اس وقت ملک میں چینی کا 65 لاکھ ٹن اسٹاک موجود ہے اور چینی کی سالانہ کھپت 63 لاکھ ٹن ہے۔
انہوں نے کہا کہ اس سال 60 لاکھ ٹن چینی کی پیداوار ہوئی جس میں گزشتہ سال کے مقابلے میں 0.5 ملین ٹن کا کیری اوور اسٹاک موجود ہے جس کے بعد مجموعی طور پر 6.5 ملین ٹن چینی پیدا ہوئی ہے۔
وفاقی وزیر نے اس تاثر کو مسترد کیا کہ گزشتہ سال چینی کی برآمد کی وجہ سے ملک میں چینی کی قیمتوں میں اضافہ ہوا اور کہا کہ گزشتہ سال ملک میں 7.6 ملین ٹن چینی کا اسٹاک تھا جبکہ گھریلو کھپت 6.3 ملین ٹن تھی۔
گزشتہ سال کل سرپلس اسٹاک 15 لاکھ ٹن تھا جس میں سے ہم نے 7 لاکھ ٹن چینی برآمد کی تھی جس کے ذریعے ملک کو 40 کروڑ ڈالر کا زرمبادلہ حاصل ہوا تھا۔
انہوں نے چینی 180 روپے فی کلو فروخت ہونے کی خبروں کو بھی بے بنیاد قرار دیا۔
ملک میں چینی کی قیمتوں میں اضافے سے متعلق خبروں کے بعد وزیر اعظم نے نوٹس لیتے ہوئے چینی کی قیمت کے تعین کے لیے نائب وزیراعظم اسحاق ڈار کی سربراہی میں کمیٹی تشکیل دے دی ہے۔
انہوں نے کہا کہ کمیٹی نے چینی کی ایکس مل اور ریٹیل قیمتیں مقرر کی ہیں، کمیٹی کے اجلاس اور اس معاملے پر حکومت کی جانب سے اٹھائے گئے اقدامات کے بعد اکبری منڈی میں چینی کی قیمت 168 روپے فی کلو سے کم ہوکر 162 روپے فی کلو ہوگئی ہے۔
انہوں نے کہا کہ حکومت نے پی ایس ایم اے کے ساتھ مل کر رمضان المبارک میں ملک بھر میں 274 اسٹالز لگائے ہیں جہاں چینی 130 روپے فی کلو میں دستیاب ہے۔ انہوں نے کہا کہ یوٹیلیٹی اسٹورز کارپوریشن (یو ایس سی) میں چینی 153 روپے فی کلو میں دستیاب ہے۔
انہوں نے یقین دلایا کہ کسی بھی صورت میں چینی کی ریٹیل قیمت 164 روپے فی کلو سے تجاوز کرنے کی اجازت نہیں دی جائے گی۔ انہوں نے کہا کہ اگر کسی نے چینی کی قیمت بڑھانے کی کوشش کی تو وفاقی حکومت صوبوں کے تعاون سے سخت کارروائی کرے گی۔
کاپی رائٹ بزنس ریکارڈر، 2025