وفاقی وزیر برائے اطلاعات و نشریات عطاء اللہ تارڑ نے کہا ہے کہ پریوینشن آف الیکٹرانک کرائمز ایکٹ (پیکا) کا مقصد جعلی خبروں کا خاتمہ اور سوشل میڈیا کے ذریعے ہونے والے نقصانات سے نمٹنا ہے۔

ایسوسی ایٹڈ پریس آف پاکستان (اے پی پی) یونین کی تقریب حلف برداری میں بطور مہمان خصوصی خطاب کرتے ہوئے انہوں نے اس بات پر زور دیا کہ صحافت کی آڑ میں سوشل میڈیا کو بے قابو نہیں چھوڑا جاسکتا۔

انہوں نے متنبہ کیا کہ جعلی پروپیگنڈا، جھوٹی خبریں، ہراسانی، بچوں سے بدسلوکی کا مواد، قومی سلامتی کو لاحق خطرات، معاشی بے یقینی اور ذاتی ہتک عزت کو آن لائن پھیلایا جا رہا ہے جس سے معاشرے میں بدامنی پیدا ہو رہی ہے۔

ڈیجیٹل پلیٹ فارمز کو ریگولیٹ کرنے کے لئے ، عطا تارڑ نے ڈیجیٹل میڈیا پروٹیکشن اتھارٹی کے قیام کا اعلان کیا ، جس میں نجی شعبے ، پریس کلبوں اور صحافی تنظیموں کے ارکان شامل ہوں گے۔

صحافی اور آئی ٹی پروفیشنلز بھی اس ٹریبونل کا حصہ ہوں گے۔ اتھارٹی تیزی سے فیصلہ سازی کو یقینی بنائے گی، ٹریبونلز کو 24 گھنٹوں کے اندر احکامات جاری کرنے کی ضرورت ہوگی، اور ہائی کورٹ اور سپریم کورٹ میں اپیلیں کی جاسکتی ہیں۔ وزیراطلاعات نے یقین دلایا کہ فریم ورک کو حتمی شکل دینے سے پہلے تمام اسٹیک ہولڈرز سے مشاورت کی جائے گی۔

عطا تارڑ نے کہا، ”یہ سوشل میڈیا سے پیدا ہونے والے خطرات سے نمٹنے میں ایک اہم قدم ہے،“ انہوں نے مزید کہا کہ قانون غلط معلومات اور بدنیتی پر مبنی مواد کو روکنے میں مدد کرے گا۔ انہوں نے صحافتی تنظیموں پر زور دیا کہ وہ اس قانون سازی کی حمایت کریں جس میں عالمی بہترین طریقوں کو شامل کیا گیا ہے۔

وفاقی وزیر نے کرپشن کے مضر اثرات پر بھی روشنی ڈالی اور کہا کہ اس سے اداروں کو ناقابل تلافی نقصان پہنچا ہے۔ انہوں نے وزارت اطلاعات کے ماتحت اداروں میں اصلاحات، انہیں منافع بخش اور موثر بنانے کے حکومتی عزم کا اعادہ کیا۔

انہوں نے ادارے کے اندر کرپشن کو بے نقاب کرنے پر اے پی پی کے منیجنگ ڈائریکٹر عاصم کھچی کی تعریف کی اور اس عزم کا اظہار کیا کہ ایسے مقدمات کو منطقی انجام تک پہنچایا جائے گا۔

انہوں نے عالمی سطح پر پاکستان کے تشخص کو فروغ دینے میں پاکستان ٹیلی ویژن (پی ٹی وی)، ریڈیو پاکستان اور اے پی پی جیسے قومی اداروں کے اہم کردار پر روشنی ڈالی۔

انہوں نے یاد دلایا کہ ریڈیو پاکستان کو سب سے پہلے پاکستان کی آزادی کا اعلان کرنے کا اعزاز حاصل ہے جبکہ پی ٹی وی ثقافتی فروغ میں کلیدی کردار ادا کر رہا ہے۔

صحافیوں کی جدوجہد کو تسلیم کرتے ہوئے عطا تارڑ نے یقین دلایا کہ ان کے چیلنجز سے نمٹنا اولین ترجیح ہے۔ انہوں نے اعلان کیا کہ ملازمت کے دوران انتقال کرنے والے صحافیوں کے لیے آئندہ بجٹ میں فنڈز مختص کیے جائیں گے۔

ریڈیو پاکستان لاہور کے دفتر پہنچنے پر عطاء اللہ تارڑ کا ڈھول کی تھاپ، گھوڑوں کے رقص اور گلاب کی پتیوں سے پرتپاک استقبال کیا گیا۔ انہوں نے نومنتخب اے پی پی ایمپلائز یونین کے عہدیداروں کو حلف دلایا اور انہیں منتخب ہونے پر مبارکباد دی۔

انہوں نے قومی اثاثہ کے طور پر ملازمین کی اہمیت پر زور دیتے ہوئے ان پر زور دیا کہ وہ اپنے ادارے کی بہتری کے لئے لگن اور دیانت داری کے ساتھ کام کریں۔ انہوں نے ملازمین کے مسائل کے حل کی یقین دہانی بھی کرائی اور شرکاء میں شیلڈز تقسیم کیں۔

تقریب میں مسلم لیگ (ن) کی رہنما بیگم ساجدہ فاروق تارڑ (وزیر کی والدہ)، کوآرڈینیٹر برائے ورثہ و ثقافت فرح دیبا، ڈائریکٹر جنرل ریڈیو شیخ سعید، بیورو چیف اے پی پی لاہور طالب حسین اور متعدد سینئر صحافیوں اور میڈیا پروفیشنلز نے شرکت کی۔