انٹربینک مارکیٹ میں منگل کے کاروباری روز امریکی ڈالر کے مقابلے میں پاکستانی روپے کی قدر میں 0.04 فیصد کی کمی ریکارڈ کی گئی ہے۔

کاروبار کے اختتام پر ڈالر کے مقابلے میں قدر 10 پیسے کم ہونے کے بعد روپیہ 279 روپے 77 پیسے پر بند ہوا۔

واضح رہے کہ گزشتہ ہفتے انٹر بینک مارکیٹ میں ڈالر کے مقابلے روپے میں 10 پیسے یا 0.4 فیصد کی کمی ریکارڈ کی گئی تھی۔

اسٹیٹ بینک آف پاکستان (ایس بی پی) کے مطابق گزشتہ ہفتے کے اختتام پر ڈالر 279.67 روپے پر بند ہوا تھا جبکہ گزشتہ سے پیوستہ ہفتے یہ 279.57 روپے پر تھا۔

یاد رہے کہ کرنسی مارکیٹ پیر کو بینک تعطیل کی وجہ سے بند تھی۔

عالمی سطح پر امریکی ڈالر کمزور رہا جب کہ اسٹرلنگ ڈیڑھ ماہ کی بلند ترین سطح کے قریب برقرار رہا، اور یورو بھی مستحکم رہا کیونکہ یورپی رہنماؤں نے واشنگٹن میں پیش کرنے کیلئے یوکرین امن منصوبہ تیار کیا۔

سرمایہ کاروں میں خدشات بڑھ گئے جب امریکی صدر ڈونلڈ ٹرمپ نے اعلان کیا کہ کینیڈا اور میکسیکو پر 25 فیصد ٹیرف منگل کو صبح سے نافذ ہوگا، جبکہ چین پر محصولات دگنا کرکے 20 فیصد کردی جائیں گی۔ اس اعلان کے بعد کینیڈین ڈالر اور میکسیکن پیسو کی قدر میں تیزی سے کمی آئی جبکہ چینی یوان آف شور ٹریڈنگ میں 13 فروری کے بعد کی اپنی کم ترین سطح سے کچھ بحال ہوگیا۔

سرمایہ کاروں کو امریکی معیشت پر خاص طور پر حالیہ ہفتوں میں جاری کمزور معاشی اعداد و شمار کے پیش نظرممکنہ منفی اثرات پر بھی تشویش رہی۔

یہ خدشات پیر کو اس وقت مزید بڑھ گئے جب اعداد و شمار سے ظاہر ہوا کہ فیکٹری گیٹ قیمتیں تقریباً تین سال کی بلند ترین سطح پر پہنچ گئیں اور خام مال کی ترسیل میں تاخیر ہوئی، جس سے اشارہ ملا کہ درآمدات پر عائد ٹیرف جلد ہی پیداوار میں رکاوٹ بن سکتے ہیں۔

تاہم، کئی سرمایہ کار اور تجزیہ کار درمیانی مدت میں پرامید رہے۔