پاکستان اسٹاک ایکسچینج (پی ایس ایکس) کا بینچ مارک کے ایس ای 100 انڈیکس منگل کے روز معمولی اضافے کے ساتھ بند ہوا جس کے بعد کاروباری دن کے دوسرے نصف حصے میں فروخت کے دباؤ نے انٹرا ڈے کے دوران 100 انڈیکس میں ہونے والی زیادہ تر تیزی کو ختم کردیا۔

کے ایس ای 100 نے کاروبار کا مثبت آغاز کیا اور گزشتہ روز کے مقابلے میں 1500 سے زائد پوائنٹس کے اضافے سے بلند ترین سطح 115889.60 پوائنٹس پر پہنچ گیا۔

تاہم بعد کے گھنٹوں میں فروخت کا دباؤ دیکھا گیا جس کی وجہ سے 100 انڈیکس کم ترین سطح 114,178.56 پوائنٹس تک گر گیا۔

کاروبار کے اختتام پر بینچ مارک انڈیکس 197.98 پوائنٹس یا 0.17 فیصد اضافے کے ساتھ 114,528.09 پوائنٹس پر بند ہوا۔

سیمنٹ، کمرشل بینکوں، فرٹیلائزر، تیل و گیس کی تلاش کرنے والی کمپنیوں، او ایم سیز اور ریفائنری سمیت اہم شعبوں میں خریداری دیکھی گئی۔ این آر ایل، پی آر ایل، پی ایس او، شیل، ایس این جی پی ایل، ایم اے آر آئی، او جی ڈی سی، پی او ایل اور پی پی ایل سمیت انڈیکس ہیوی اسٹاک میں کاروبار مثبت زون میں رہا۔

ایک اہم پیشرفت میں بین الاقوامی مالیاتی فنڈ (آئی ایم ایف) کے تکنیکی مشن نے پاکستان کی جانب سے ماحولیاتی تبدیلی سے نمٹنے کے لیے تقریباً 1.5 ارب ڈالر کی اضافی مالی معاونت کی درخواست پر اہم مذاکرات کا آغاز کردیا ہے ۔

یہ بات چیت آئی ایم ایف کے لچک دار اور پائیداری سہولت (آر ایس ایف) انتظامات کے حصے کے طور پر ہوئی ہے، جو آب و ہوا کی لچک کے منصوبوں کے لئے طویل مدتی مالی اعانت فراہم کرتا ہے۔

یہ مذاکرات آئی ایم ایف کے ریزیلینس اینڈ سسٹینبیلٹی فسیلٹی (آر ایس ایف) انتظامات کا حصہ ہیں جو ماحولیاتی استحکام کے منصوبوں کیلئے طویل مدتی مالی معاونت فراہم کرتے ہیں۔

یاد رہے کہ پیر کو اسٹاک مارکیٹ میں کاروبار کا آغاز مثبت زون میں ہوا جس کے نتیجے میں کے ایس ای 100 انڈیکس 1,529.17 پوائنٹس یا 1.36 فیصد اضافے سے 114,330.10 پوائنٹس پر بند ہوا تھا۔

بین الاقوامی سطح پر ایشیائی حصص منگل کو گرگئے کیونکہ سرمایہ کار امریکا کی جانب سے چین پر ممکنہ سرمایہ کاری پابندیوں کے بارے میں فکر مند رہے جب کہ یورو میں حالیہ اضافہ بھی مدھم پڑگیا کیونکہ سرمایہ کار جرمنی میں نئی حکومت کی تشکیل کے حوالے سے کسی بڑی غیر یقینی صورتحال کا انتظار کر رہے ہیں۔

سونے کی قیمتیں ریکارڈ سطح پر پہنچ گئیں، جس کی وجہ تجارتی محصولات سے متعلق خدشات ہیں۔ سرمایہ کار اینویڈیا کے نتائج سے قبل بھی محتاط ہیں، جہاں آپشنز اشارہ دے رہے ہیں کہ اگر نتائج توقعات سے مختلف ہوئے تو شیئر کی قیمت میں تقریباً 8 فیصد کا اتار چڑھاؤ آ سکتا ہے۔

ایم ایس سی آئی کا وسیع ترین ایشیا پیسیفک انڈیکس (جاپان کے علاوہ) 1.3 فیصد گرگیا۔ جاپان کا نکی انڈیکس عام تعطیل کے بعد 0.9 فیصد کمی کے ساتھ کھلا، تاہم اس کی پانچ بڑی ٹریڈنگ کمپنیوں کے شیئرز میں اضافہ ہوا۔

بینک آف کوریا نے منگل کو متوقع طور پر اپنی شرح سود میں ایک چوتھائی پوائنٹ کی کمی کی جس سے جنوبی کوریا کے حصص کو کچھ نقصانات میں کمی کرنے میں مدد ملی ہے۔

ہانگ کانگ کا ہینگ سینگ انڈیکس 2.3 فیصد گر گیا، جو پیر کے نقصان کے بعد مزید کمی کا شکار ہوا۔ یہ کمی اس وقت آئی جب امریکی صدر ڈونلڈ ٹرمپ نے چپس، مصنوعی ذہانت (اے آئی) اور ایرو اسپیس جیسے اسٹریٹجک شعبوں میں چینی سرمایہ کاری کو محدود کرنے کے لیے ایک حکم نامے پر دستخط کیے۔ چینی بلو چپ شیئرز 0.9 فیصد نیچے چلے گئے۔

دریں اثناء انٹر بینک مارکیٹ میں منگل کے روز امریکی ڈالر کے مقابلے میں پاکستانی روپے کی قدر میں کوئی تبدیلی نہیں ہوئی۔ کاروبار کے اختتام پر روپیہ ایک پیسے کی کمی کے ساتھ 279.67 روپے پر بند ہوا۔

آل شیئر انڈیکس کا حجم گزشتہ روز کے 455.53 ملین سے بڑھ کر 495.98 ملین ہو گیا۔

حصص کی مالیت گزشتہ سیشن کے 25.89 ارب روپے سے بڑھ کر 29.36 ارب روپے ہوگئی۔

فوجی سیمنٹ 61.09 ملین حصص کے ساتھ سب سے آگے رہی، اس کے بعد میپل لیف 33.82 ملین حصص کے ساتھ دوسرے اور اطہور لمیٹڈ 23.91 ملین حصص کے ساتھ تیسرے نمبر پر رہی۔

منگل کو 444 کمپنیوں کے حصص کا کاروبار ہوا جن میں سے 169 کمپنیوں کے حصص کی قیمتوں میں اضافہ، 223 میں کمی جبکہ 52 میں استحکام رہا۔