زیادہ فروخت کے باوجود پاکستان کے سب سے بڑے ٹیکسٹائل برآمد کنندگان میں سے ایک انٹرلوپ لمیٹڈ (آئی ایل پی) کا منافع 31 دسمبر 2024 کو ختم ہونے والی سہ ماہی کے دوران 70 فیصد سے زیادہ کم ہو کر 1.15 ارب روپے رہ گیا۔

پاکستان اسٹاک ایکسچینج (پی ایس ایکس) کو بھیجے گئے نوٹس کے مطابق کمپنی نے گزشتہ سال کے اسی عرصے (ایس پی ایل وائی) میں 3.81 ارب روپے کا مجموعی منافع حاصل کیا تھا۔

اس عرصے کے دوران فی حصص آمدنی (ای پی ایس) کم ہو کر 0.82 روپے رہ گئی جو گزشتہ برس کے اس عرصے میں 2.72 روپے تھی۔

منافع میں کمی سہ ماہی کے دوران فروخت کی اعلی لاگت اور آپریٹنگ اخراجات کی وجہ سے آئی ہے۔

مالی سال 25 کی دوسری سہ ماہی کے دوران ٹیکسٹائل کمپنی کی خالص فروخت تقریبا 26 فیصد اضافے کے ساتھ 44.6 ارب روپے رہی جو گزشتہ سال 35.45 ارب روپے ریکارڈ کی گئی تھی۔

زیادہ فروخت کے باوجود انٹر لوپ کا مجموعی منافع مالی سال 2025 کی دوسری سہ ماہی میں 9 فیصد سے زائد کم ہوکر 8.95 ارب روپے رہ گیا۔ نتیجتا کمپنی کا منافع مارجن کم ہو کر 20.1 فیصد رہ گیا جبکہ گزشتہ برس کے اس عرصے میں یہ شرح 27.9 فیصد تھی۔

دوسری جانب مالی سال 25 کی دوسری سہ ماہی میں کمپنی کے آپریٹنگ اخراجات میں سالانہ تقریبا 21 فیصد اضافہ ہوا اور یہ 4.88 ارب روپے تک پہنچ گیا۔

ٹیکسٹائل ایکسپورٹر کا آپریشنز سے منافع کم ہو کر 4.35 ارب روپے رہ گیا جو گزشتہ برس کے اس عرصے میں 6.92 ارب روپے کے مقابلے میں 37 فیصد سے زیادہ کم ہے۔

مالی سال 2025 کی دوسری سہ ماہی میں کمپنی کی فنانس لاگت 4 فیصد اضافے کے ساتھ 2.7 ارب روپے تک پہنچ گئی۔

اس کے نتیجے میں مالی سال 25 کی دوسری سہ ماہی میں قبل از ٹیکس منافع 1.65 ارب روپے رہا جو گزشتہ برس کی اس مدت میں 4.32 ارب روپے کے مقابلے میں 62 فیصد کم ہے۔

سال 1992 میں قائم ہونے والا انٹرلوپ 2019 میں ملک کی اسٹاک ایکسچینج میں رجسٹر کیا گیا تھا۔

یہ کمپنی ایک عمودی طور پر مربوط، متعدد زمروں پر مشتمل ادارہ ہے جو موزے، ڈینم، بُنے ہوئے ملبوسات اور ایکٹیو ویئر تیار کرتی ہے۔ اس کے علاوہ، یہ ٹیکسٹائل صارفین کے لیے سوت بھی تیار کرتی ہے۔ یہ پاکستان کی سب سے بڑی برآمدی کمپنیوں میں سے ایک ہے اور پاکستان اسٹاک ایکسچینج میں لسٹڈ سب سے بڑی کمپنیوں میں شمار ہوتی ہے۔

اس کے تمام پلانٹس صوبہ پنجاب میں واقع ہیں۔