بھارت اور امریکہ نے جلد تجارتی معاہدے کے لیے مذاکرات شروع کرنے اور محصولات پر پیدا تنازع کو حل کرنے پر اتفاق کیا ہے جبکہ نئی دہلی نے مزید امریکی تیل، گیس اور فوجی سازوسامان خریدنے اور غیر قانونی امیگریشن کے خلاف لڑنے کا وعدہ کیا ہے۔
وائٹ ہاؤس میں امریکی صدر ڈونلڈ ٹرمپ اور بھارتی وزیر اعظم نریندر مودی کے درمیان بات چیت کے بعد معاہدوں کا یہ سلسلہ سامنے آیا، جس کے چند گھنٹے بعد ہی ٹرمپ نے بھارت میں امریکی کاروباری اداروں کے لیے ماحول کے بارے میں بات کی اور امریکی درآمدات پر محصولات عائد کرنے والے ممالک پر دوطرفہ محصولات کے لیے ایک روڈ میپ کا اعلان کیا۔
ٹرمپ نے کہا کہ وزیر اعظم مودی نے حال ہی میں بھارت کے غیر منصفانہ، بہت سخت محصولات میں کمی کا اعلان کیا ہے جو بھارتی مارکیٹ تک ہماری رسائی کو بہت سختی سے محدود کرتے ہیں۔ اور واقعی یہ ایک بہت بڑا مسئلہ ہے جو مجھے کہنا چاہئے.
بھارت کے خارجہ سکریٹری وکرم مسری نے کہا کہ تجارتی خدشات کو حل کرنے کے لئے معاہدہ آئندہ 7 ماہ کے اندر کیا جاسکتا ہے۔
اجلاس کے بعد ایک مشترکہ بیان میں کہا گیا ہے کہ واشنگٹن نے منتخب امریکی مصنوعات پر محصولات میں کمی اور امریکی زرعی مصنوعات کی مارکیٹ تک رسائی بڑھانے کے لئے نئی دہلی کے حالیہ اقدامات کا خیرمقدم کیا ہے جبکہ 2025 کے موسم خزاں تک تجارتی معاہدے کے ابتدائی حصوں پر بات چیت کرنے کی کوشش کی ہے۔
وکرم مسری کا مزید کہنا تھا کہ اگرچہ دونوں رہنماؤں کے پاس محصولات کے بارے میں ”اپنے نقطہ نظر“ تھے ، “اس سے زیادہ قابل ذکر بات کیا ہے . یہ حقیقت ہے کہ ہمارے پاس اس معاملے پر آگے بڑھنے کا راستہ ہے۔
ٹرمپ نے مودی کے ساتھ ایک مشترکہ پریس کانفرنس میں کہا کہ بھارت امریکی دفاعی سازوسامان کی خریداری میں اربوں ڈالر کا اضافہ کرنا چاہتا ہے اور واشنگٹن کو تیل اور گیس کا نمبر ایک سپلائر بنا سکتا ہے۔
مودی نے کہا کہ دہلی 2030 تک واشنگٹن کے ساتھ تجارت کو دگنا کرنا چاہتا ہے۔ جوہری توانائی پر طویل منصوبہ بند تعاون، جس پر رہنماؤں نے بھی تبادلہ خیال کیا، کو موجودہ قانونی چیلنجز کا سامنا ہے۔
ٹرمپ نے کہا کہ ہم بھارت کو ایف 35 اسٹیلتھ لڑاکا طیارے فراہم کرنے کی راہ بھی ہموار کر رہے ہیں۔
بھارتی عہدیدار مسری نے بعد میں کہا کہ ایف 35 لڑاکا طیاروں کا معاہدہ اس وقت ایک تجویز ہے جس کا کوئی باضابطہ عمل جاری نہیں ۔ وائٹ ہاؤس نے کسی بھی معاہدے پر تبصرہ کرنے کی درخواست کا جواب نہیں دیا۔
ٹرمپ کیا چاہتے ہیں
اگرچہ ٹرمپ کے اپنے پہلے دور حکومت میں مودی کے ساتھ گرم جوش تعلقات تھے ، لیکن انہوں نے جمعرات کو ایک بار پھر کہا کہ بھارت کے محصولات بہت زیادہ ہیں اور انہوں نے ان کے برابر ہونے کا وعدہ کیا ، حالانکہ اسٹیل اور ایلومینیم پر ان کے پہلے کے محصولات نے دھات پیدا کرنے والے بھارت کو خاص طور پر شدید نقصان پہنچایا تھا۔
پریس کانفرنس کے دوران ٹرمپ نے کہا کہ ہم بھارت کے ساتھ ٹیرف کے حوالے سے جوابی رویہ اختیار کر رہے ہیں۔ بھارت ہم پر جو بھی محصول عائد کرتا ہے ، ہم اس پراتنا ہی عائد کرتے ہیں۔
مودی نے ہندوستان کے مفادات کے تحفظ کا عہد کیا۔
مودی نے کہا کہ ایک چیز جس کی میں دل سے تعریف کرتا ہوں اور صدر ٹرمپ سے سیکھتا ہوں وہ یہ ہے کہ وہ قومی مفاد کو مقدم رکھتے ہیں۔ ان کی طرح میں بھی ہندوستان کے قومی مفاد کو ہر کام میں سرفہرست رکھتا ہوں۔
دونوں رہنماؤں نے ایک دوسرے کی تعریف کی اور بحرہند و بحرالکاہل میں سیکورٹی تعاون کو مزید گہرا کرنے پر اتفاق کیا، چین کے ساتھ مسابقت کا مخفی اشارے، کے ساتھ ساتھ مصنوعی ذہانت جیسی ٹیکنالوجیز کی مشترکہ پیداوار شروع کرنے پر بھی اتفاق کیا گیا۔
ملاقات سے قبل جب ان سے پوچھا گیا کہ بھارت کیا اقدامات کر رہا ہے تو ایک ذرائع نے اسے ٹرمپ کے لیے ایک ’تحفہ‘ قرار دیا جس کا مقصد تجارتی تناؤ کو کم کرنا ہے۔ ٹرمپ کے ایک معاون نے کہا کہ صدر کو لگتا ہے کہ بھارت کو دفاعی سازو سامان اور توانائی کی فروخت سے امریکی تجارتی خسارہ کم ہوگا۔
انہوں نے کہا کہ مستقبل قریب میں امریکہ سے بھارت کی توانائی کی خریداری گزشتہ سال کے 15 ارب ڈالر سے بڑھ کر 25 ارب ڈالر تک پہنچ سکتی ہے اور اس سے تجارتی خسارے کو کم کرنے میں مدد مل سکتی ہے۔
تھنک ٹینک سینٹر فار اسٹریٹجک اینڈ انٹرنیشنل اسٹڈیز میں انڈیا پروگرام کے سربراہ رچرڈ روسو نے کہا کہ ٹیرف دونوں ممالک کے تعلقات پر حاوی رہیں گے۔
انہوں نے کہا کہ اس حوالے سے ایک باکسنگ میچ ہونے جا رہا ہے. انہوں نے کہا کہ بھارت کچھ ضربیں کھانے کو تیار ہے لیکن ایک حد تک۔
امریکہ کا بھارت کے ساتھ 45.6 ارب ڈالر کا تجارتی خسارہ ہے۔ ورلڈ ٹریڈ آرگنائزیشن کے اعداد و شمار کے مطابق، مجموعی طور پر، امریکہ کی تجارت پر مبنی اوسط ٹیرف کی شرح تقریباً 2.2 فیصد رہی ہے جبکہ بھارت کی شرح 12 فیصد ہے۔
غیر قانونی امیگریشن کے خلاف جنگ
ٹرمپ غیر قانونی امیگریشن پر بھارت سے مزید مدد چاہتے ہیں۔ بھارت امریکہ میں تارکین وطن کا ایک بڑا ذریعہ ہے ، جس میں ورک ویزا پر ٹیک انڈسٹری میں کام کرنے والوں کی بڑی تعداد اور غیر قانونی طور پر امریکہ منتقل ہونے والے دیگر بھارتی شہری شامل ہیں۔
مشترکہ اعلامیے میں کہا گیا ہے کہ دونوں ممالک نے قانون نافذ کرنے والے اداروں کے تعاون کو مضبوط بنا کر غیر قانونی امیگریشن اور انسانی اسمگلنگ سے جارحانہ انداز میں نمٹنے پر اتفاق کیا۔
چین کو ناکام بنانے کی ٹرمپ کی حکمت عملی میں بھارت اہم ثابت ہوسکتا ہے، جسے ان کی انتظامیہ میں بہت سے لوگ امریکہ کے سب سے بڑے حریف کے طور پر دیکھتے ہیں۔ بھارت ہمسایہ ملک چین کی فوجی تیاری سے خطرہ محسوس کرتا ہے اور اسی طرح وہ چین کے ساتھ بہت سی منڈیوں کے لیے مقابلہ کرتا ہے۔
یو ایس انڈیا اسٹریٹیجک پارٹنرشپ فورم لابنگ گروپ کے صدر مکیش اگی کے مطابق مودی کو اس بات پر بھی تشویش ہے کہ ٹرمپ چین کے ساتھ ایک ایسا معاہدہ کر سکتے ہیں جس میں بھارت شامل نہ ہو۔
بھارت نے روس کے ساتھ اپنے تعلقات جاری رکھے ہوئے ہیں جبکہ اس کی یوکرین کے ساتھ جنگ جاری ہے۔ مثال کے طور پر بھارت روسی توانائی کا ایک بڑا صارف رہا ہے جبکہ مغرب نے جنگ شروع ہونے کے بعد سے اپنی کھپت کم کرنے کے لیے کام کیا ہے۔
مودی نے کہا کہ دنیا کی یہ سوچ تھی کہ اس سارے عمل میں بھارت کسی نہ کسی طرح ایک غیر جانبدار ملک ہے۔ لیکن یہ سچ نہیں ہے، ہندوستان کا ایک فریق ہے اور وہ فریق امن ہے۔