بین الاقوامی مارکیٹ میں سونے کے نرخوں میں اضافے کے تناظر میں پاکستان میں بھی سونے کی قیمتیں بڑھنے کا سلسلہ جاری ہے۔ مقامی صرافہ مارکیٹوں میں منگل کے روز سونے کی فی تولہ قیمت ایک ہزار 900 روپے اضافے سے 2 لاکھ 94 ہزار 300 روپے ہوگئی۔

آل پاکستان جیمز اینڈ جیولرز صرافہ ایسوسی ایشن (اے پی جی جے ایس اے) کے مطابق 10 گرام سونے کی قیمت 1629 روپے اضافے کے بعد 2 لاکھ 52 ہزار 314 روپے ہوگئی۔

پیر کو پاکستان میں سونے کی فی تولہ قیمت 200 روپے اضافے سے 2 لاکھ 92 ہزار 400 روپے کی بلند ترین سطح پر پہنچ گئی تھی۔

دریں اثنا منگل کے روز سونے کے بین الاقوامی نرخ میں اضافہ ہوا۔ اے پی جی جے ایس اے کے مطابق فی اونس سونے کی قیمت 2,815 ڈالر تھی اور کاروباری دن کے دوران 16 ڈالر بڑھ گئی۔

دوسری جانب چاندی کی فی تولہ قیمت میں بھی 49 روپے کا اضافہ ہوا جس کے بعد فی تولہ چاندی کی قیمت 3 ہزار 314 روپے ہوگئی۔