بین الاقوامی مارکیٹ میں بدھ کے روز سونے کے نرخوں میں اضافے کے تناظر میں پاکستان میں بھی سونے کی قیمت میں اضافہ ریکارڈ کیا گیا۔ مقامی صرافہ مارکیٹوں میں بدھ کو سونے کی فی تولہ قیمت 2300 روپے اضافے سے 2 لاکھ 88 ہزار 700 روپے ہوگئی۔

آل پاکستان جیمز اینڈ جیولرز صرافہ ایسوسی ایشن (اے پی جی جے ایس اے) کے مطابق 10 گرام سونے کی قیمت 1972 روپے اضافے کے بعد 2 لاکھ 47 ہزار 513 روپے ہوگئی۔

منگل کو سونے کی فی تولہ قیمت 2700 روپے کمی کے بعد 2 لاکھ 86 ہزار 400 روپے ہوگئی تھی۔

بدھ کے روز سونے کے بین الاقوامی نرخ میں اضافہ ہوا۔ اے پی جی جے ایس اے کے مطابق فی اونس سونے کی قیمت 2,763 ڈالر تھی، جس میں کاروباری دن کے دوران 22 ڈالر کا اضافہ ہوا۔

دوسری جانب چاندی کی فی تولہ قیمت 28 روپے اضافے سے 3 ہزار 391 روپے ہوگئی۔