پاک فوج کے شعبہ تعلقات عامہ یعنی آئی ایس پی آر کا کہنا ہے کہ بلوچستان کے ضلع ژوب میں سیکورٹی فورسز نے پاک افغان سرحد سے دراندازی کی کوشش کرنے والے 6 دہشتگردوں کو ہلاک کردیا۔

آئی ایس پی آر کے مطابق 22 اور 23 جنوری کی شب سیکورٹی فورسز نے ضلع ژوب کے علاقے سمبازہ میں پاک افغان سرحد کے ذریعے دراندازی کی کوشش کرنے والے خوارج کے ایک گروپ کا سراغ لگایا۔

بیان کے مطابق فورسز نے دراندازی روکنے کیلئے مؤثر انداز میں کارروائی کی جس کے نتیجے میں 6 خوارج کو واصل جہنم کردیا گیا۔

بیان میں مزید کہا گیا ہے کہ آپریشن کے بعد فورسز نے بھاری مقدار میں اسلحہ، گولہ بارود اور دھماکہ خیز مواد بھی برآمد کیا۔

پاکستان مسلسل عبوری افغان حکومت سے اپنی سرحد پر موثر سرحدی انتظام کو یقینی بنانے کیلئے اقدامات کا مطالبہ کرتا رہا ہے۔

آئی ایس پی آر کا کہنا تھا کہ عبوری افغان حکومت سے توقع کی جاتی ہے کہ وہ اپنی ذمہ داریاں پوری کرے گی اور خوارج کی جانب سے پاکستان کے خلاف دہشت گردی کی کارروائیوں کے لیے افغان سرزمین کے استعمال کی اجازت نہیں دے گی۔

بیان میں کہا گیا ہے کہ پاکستان کی سیکورٹی فورسز اپنی سرحدوں کو محفوظ بنانے اور ملک سے دہشت گردی کی لعنت کے خاتمے کے لیے پرعزم ہیں۔