وفاقی وزیر برائے سرمایہ کاری بورڈ، نجکاری اور مواصلات عبدالعلیم خان نے کہا ہے کہ ملک میں پائیدار ترقی اور معاشی بہتری کے لیے سرمایہ کاروں کو پرکشش منافع دیا جائیگا، جس سے روزگار میں اضافہ ہوگا اور ہر شعبے پر مثبت اثرات مرتب ہوں گے۔

ان خیالات کا اظہار علیم خان نے ملٹی نیشنل کمپنی سی سی آئی کے سی ای او کریم یاہی سے ملاقات کے دوران کیا جہاں انہوں نے پاکستان میں کاروبار کے فروغ سمیت سرمایہ کاری سے متعلق اہم امور پر تبادلہ خیال کیا۔

علیم خان نے کہا کہ 240 ملین کی آبادی والے پاکستان میں کاروبار شروع کرنے کے بے پناہ مواقع موجود ہیں جو ملکی اور غیر ملکی سرمایہ کاروں کے لئے فائدہ مند ثابت ہوسکتے ہیں۔

وفاقی وزیر نے کہا کہ غیر ملکی سرمایہ کاروں کو پاکستان میں زیادہ سے زیادہ کاروباری سہولیات فراہم کی جارہی ہیں اور یہ ضروری ہے کہ پاکستان میں کاروبار اور سرمایہ کاری کرنے والے پرکشش سہولیات کے ساتھ عملی اور سازگار ماحول محسوس کریں۔

علیم خان نے مزید کہا کہ حکومت کے مثبت اقدامات سے افراط زر کی شرح میں نمایاں کمی آئی ہے جو ایک انتہائی خوش آئند پیش رفت ہے اور اس سے نہ صرف مستقبل میں کاروبار میں اضافہ ہوگا بلکہ سالانہ شرح نمو میں بھی بہتری آئے گی۔

علیم خان نے کہا کہ پاکستان کی آبادی کا ایک بڑا حصہ نوجوانوں پر مشتمل ہے اور ہمیں کاروبار کے لئے قدم اٹھاتے وقت ان کے کاروباری رجحان کو ذہن میں رکھنا ہوگا۔ انہوں نے کہا کہ ترکی کی کاروباری کمپنیاں ہمارے دلوں کے قریب ہیں اور ہم ہمیشہ ان کے لیے خصوصی تعاون کو یقینی بناتے ہیں۔ انہوں نے کریم یاہی کی ترکی سے وابستگی کو سراہا اور انہیں ہر ممکن تعاون کی یقین دہانی کرائی۔

ملٹی نیشنل کمپنی سی سی آئی کے سی ای او کریم یاہی نے وفاقی وزیر سے گفتگو کرتے ہوئے پاکستان میں مزید سرمایہ کاری میں گہری دلچسپی کا اظہار کیا جس پر علیم خان نے سی ای او کریم یاہی کو مسلسل رابطے کی یقین دہانی کرائی اور کہا کہ انہیں پاکستان میں سرمایہ کاری اور کاروبار بڑھانے کے لیے مکمل تعاون ملے گا۔

سی سی آئی کے سی ای او کریم یاہی نے پاکستان اور اس کے شہریوں کے ساتھ خیر سگالی کا اظہار کرتے ہوئے علیم خان کے کاروبار دوست اقدامات کو سراہتے ہوئے یقین دلایا کہ ان کی کمپنی ایسے مواقع سے ضرور فائدہ اٹھائے گی۔

کاپی رائٹ بزنس ریکارڈر، 2024