داؤد لارنس پور لمیٹڈ (ڈی ایل ایل) نے ریون انرجی لمیٹڈ (آر ای ایل) میں اپنی پوری حصص جونیپر انٹرنیشنل ایف زیڈ ایل ایل سی کو منتقل کردی ہے۔
ڈی ایل ایل کی جانب سے منگل کو پاکستان اسٹاک ایکسچینج (پی ایس ایکس) کو بھیجے گئے اپنے نوٹس میں کمپنی کی قابل تجدید توانائی کی سرمایہ کاری میں ایک اہم اسٹرٹیجک تبدیلی کی نشاندہی کی گئی ہے۔
نوٹس میں کہا گیا ہے کہ ہمیں آپ کو یہ بتاتے ہوئے خوشی ہو رہی ہے کہ کمپنی نے 7 اکتوبر 2024 کو ریون انرجی لمیٹڈ (آر ای ایل) میں اپنی پوری شیئر ہولڈنگ (یعنی 102،600،000 حصص جو آر ای ایل کے جاری کردہ اور ادا شدہ سرمائے کا 100 فیصد بنتا ہے) جونیپر انٹرنیشنل ایف زیڈ ایل ایل سی کو منتقل کردی ہے۔
حصص کی منتقلی 22 مارچ 2023 کو حصص کی خریداری کے معاہدے کے تحت طے شدہ شرائط و ضوابط کے تحت کی گئی۔
ریون انرجی ایک توانائی کمپنی ہے ، جو صنعتوں کو شمسی توانائی کے حل ، توانائی اسٹوریج ، برقی گاڑیوں کی چارجنگ ، اور توانائی کے اثاثوں کی ڈیجیٹلائزیشن فراہم کرتی ہے۔
سال 2004 میں پاکستان میں ایک پبلک لسٹڈ کمپنی کے طور پر قائم ہونے والی ڈی ایل ایل داؤد کاٹن ملز لمیٹڈ، دلون لمیٹڈ، بورے والا ٹیکسٹائل ملز لمیٹڈ اور لارنس پور وولن اینڈ ٹیکسٹائل ملز لمیٹڈ کے درمیان انضمام کی اسکیم کے نتیجے میں قائم کی گئی تھی۔
کمپنی اپنے ماتحت اداروں اور متعلقہ کمپنیوں میں سرمایہ کاری کے انتظام میں مصروف ہے۔ کمپنی قابل تجدید توانائی کے حل خاص طور پر تجارتی اور صنعتی صارفین کے لئے شمسی توانائی کے حل کی تجارت اور مارکیٹنگ میں بھی مصروف تھی۔
گزشتہ ماہ ڈی ایل ایل نے مطلع کیا تھا کہ 49.5 میگاواٹ کے ونڈ پاور پلانٹ کے ساتھ ایک انڈیپنڈنٹ پاور پروڈیوسر (آئی پی پی) ٹیناگا جینرسی لمیٹڈ کی آرٹسٹک ملینرز (پرائیویٹ) لمیٹڈ کو مجوزہ فروخت مقررہ مدت کے اندر شرائط پوری نہ ہونے کی وجہ سے آگے نہیں بڑھے گی۔